Dünən avqustun ilk günündə Bilgəh kardioloji sanatoriyasının klubunda tanınmış yazıçı-jurnalist Nurəddin Ədiloğlu ilə görüş keçirilmişdir.
Bu haqda Müstəqil.Az-a yazıçının özü məlumat verib.
Görüşü giriş sözü ilə Bilgəh sanatoriyasında fəaliyyət göstərən kitabxananın müdiri Nazifə Babayeva açıb. Filologiya elmləri doktoru, professor Buludxan Xəlilov yazıçının yaradıcılığı haqqında görüş iştirakçılarına ətraflı məlumat verib.
Naxçıvan Dövlət Universitetinin Botanika kafedrasının müdiri, biologiya elmləri doktoru Daşqın Qəmbərov, şair Balayar Sadiq, musiqi müəlliməsi, oxucu Rübabə Həsənova, şair Damət Salmanoğlu, “Azad Azərbaycan” qəzetinin əməkdaşı, yazıçı Hacı Tofiq Seyidzadə, Şəki şəhərindən istirahətə gəlmiş Rəşad Cumayev, Naxçıvan şəhərindən istirahətə gələn şairə Elmira Rzayeva, Masallı rayonundan istirahətə gələn müəllim Eynulla Zalıyev və başqaları tədbirdə çıxış edərək N.Ədiloğlunun son illərdə nəşr olunmuş “Yaralı qu quşları”, “Mənim Bağdagül nənəm” , “Sarəng zirvəsi”, “Azərnur” , “Qara sarmaşıq” əsərlər haqqında fikirlərini söyləmiş, yazıçını 60 illik yubileyi münasibəti ilə təbrik edib, ona yeni yaradıcılıq uğurları arzulamışlar.
Sonda yazıcı görüşün təşkilatçılarına minnətdarlığını bildirmiş, oxuculara və sanatoriyanın kitabxanasına yeni kitablarını hədiyyə etmişdir.
Müstəqil.Az
