Körfəz bölgəsinin turizm mərkəzi sayılan Dubaya səfər edən xarici vətəndaşların sayı 2018-ci ilin birinci yarısında 0,5 faiz artıb ki, bu da ötən ilki səviyyədən xeyli aşağıdır. Keçən il həmin göstərici 10,6 faiz təşkil etmişdi.
AZƏRTAC yerli KİV-lərə istinadla xəbər verir ki, Birləşmiş Ərəb Əmirliklərinin hakimiyyət orqanları müxtəlif görməli məkanların tikintisinə milyardlarla vəsait yatırıblar, o cümlədən dünyada ən yüksək qüllənin ucaldılmasına xeyli vəsait xərcləyiblər. Turizm Departamentinin məlumatına görə, Dubay bu ilin əvvəlindən iyunun 30-a kimi 8,1 milyon xarici turist qəbul edib.
2017-ci ilin məlumatına görə, ilin birinci yarısında şəhərə 8,06 milyon turist gəlib və inişillə müqayisədə 10,6 faiz artım qeydə alınıb.
Turizm Departamentinin 2017-ci ilin sonuna olan məlumatına görə, turizm sahəsi 109 milyard dirhəm (29,7 milyard ABŞ dolları) qiymətləndirilib.
Dubayda uzun illər sürən güclü yüksəlişdən sonra bu il bəzi sahələrdə, məsələn, daşınmaz əmlak sahəsində artım sürətinin yavaşıması müşahidə olunur.
Bu il Dubay üçün ən iri xarici bazar Hindistandır. İlin birinci yarısında Hindistandan gələn turistlərin sayı 3 faiz artaraq bir milyon nəfəri ötüb.
Çin və Rusiyadan olan turistlərin sayı müvafiq olaraq 9 faiz (453 min turist) və 74 faiz (405 min turist) artıb. Son illər BƏƏ-nin hakimiyyət orqanları turizmi təşviq etmək məqsədi ilə Çin və Rusiya vətəndaşları üçün viza rejimini sadələşdiriblər.
Bu il Dubay Beynəlxalq Aeroportunda sərnişin axını praktiki olaraq artmayıb. Belə vəziyyət 15 il sürən yüksəlişdən sonra ilk dəfə müşahidə olunur.
