Ələsgər Əhməd
Ayrılıq gələndə fəsilə baxmır
Axı ayrılığın fəsili olmur
Payızın ilk günü ayrılan kəslər
Payızdan öncədə sevgili olmur
Sadəcə özündə günah görməyən:
Adamlar payızı günahkar sayır
Sevdiyim qadının əli istidir
Çox soyuq keçsə də Noyabr ayı
Ayrılmaq istəyən onsuz ayrılır
Ya qeyri-səmimi, ya tam səmimi
Ayrılıq gələndə fəsilə baxmır
Ayrılmaq istəyən ürəklər kimi
Bəlkə də kimisə qovuşdurmuşam
Bəlkə də ayrılıq fəslidir adım
Axırda payız da bezəcək, Allah
Qışqırıb deyəcək: Mən ayırmadım
