Daxili İşlər Nazirliyinin həbsdə olan sabiq baş əməliyyat müvəkkili Hacı Məmmədov intihar edib.
Müstəqiı.AZ xəbər verir ki, Xəzər Rayon Prokurorluğundan APA-ya verilən məlumata görə, hadisə Ədliyyə Nazirliyi Penitensiar Xidmətin vərəm üzrə ixtisaslaşdırılmış müəssisəsində baş verib.
Müəssisədə müalicə alan Hacı Məmmədov özünü asaraq intihar edib və onun həyatını xilas etmək mümkün olmayıb.
Hazırda hadisə yerində Xəzər Rayon Prokurorluğunun əməkdaşları işləyir. Faktla bağlı Cinayət Məcəlləsinin 125-ci maddəsi ilə (özünü öldürmə həddinə çatdırma) cinayət işi başlanıb, intiharın səbəbləri araşdırılır.
Xatırladaq ki, DİN-in sabiq baş əməliyyat müvəkkili Hacı Məmmədov və daha 26 nəfər 2005-ci ilin martın 9-dan 10-na keçən gecə MTN-in həyata keçirdiyi “Qara kəmər” əməliyyatı nəticəsində həbs ediliblər.
H.Məmmədova qarşı Cinayət Məcəlləsinin 80 maddəsi ilə ittiham irəli sürülüb, barəsində əmlakı müsadirə olunmaqla ömürlük həbs cəzası çıxarılıb.
Məhkəmənin qərarına əsasən DİN-in Baş Cinayət Axtarış İdarəsinin keçmiş rəisi Zakir Nəsirov və daha 8 nəfər də ömürlük həbs cəzasına məhkum edilib.
Qeyd edək ki, “Primtaym”ın yaydığı bu xəbəri ailəsi təkzib etmişdi. Ailə üzvlərindən biri az öncə Musavat.com-a yayılan xəbərin yalan olduğunu, Hacı Məmmədovun özünü yaxşı hiss etdiyini bildirmişdi.
Müstəqiı.Az
***
Hacı Məmmədovun intihar səbəbi ilə bağlı ilk ehtimal irəli sürülüb.
Tanınmış jurnalist Aygün Muradxanlı sosial şəbəkə hesabından bildirib ki, o, ağır xəstəlikdən əziyyət çəkirmiş:
“Hacı Məmmədovda xərçəng vardı. 1-2 dəfə də intihara cəhd eləmişdi. Son illər şəkil çəkirdi. Hamısı da kodlu, mesajlı. Görəsən, kimdədi şəkillər?”
