“Biz həmişə “Ulduz” jurnalının üzərində oxuculara tanınmış yazıçıların kitabını hədiyyə edirdik. İndi isə gənclərin kitabını bu şəkildə çap edib hədiyyə edəcəyik”
Müstəqil.Az bildirir ki, bu sözləri Moderator.az-a açıqlamasında şair, “Ulduz” jurnalının baş redaktoru Qulu Ağsəs deyib.
Q.Ağsəs bildirib ki, AYB-ə ayrılan vəsaitdən sonra “Ulduz” jurnalının redaksiyası olaraq onlar da öz hesablarına gənc yazarların kitablarını çap edəcəklər:
“İndi 10 gənc yazarın kitabının çapı üçün artıq son tamamlama işləri gedir. Biz o kitabları çap etdikdən sonra “Ulduz” jurnalıyla birlikdə oxuculara hədiyyə edəcəyik. Düşünürəm ki, bu çox ciddi bir layihədir. Biz həmişə “Ulduz” jurnalının üzərində tanınmış yazıçıların kitabını hədiyyə edirdik. İndi isə gənclərin kitabını bu şəkildə çap edib hədiyyə edəcəyik. Çünki gənclərin öz kitablarını bizə hədiyyə etmək imkanları yoxdur. İndi dövlətimiz Azərbaycan Yazıçılar Birliyinə pul ayırandan sonra biz də Anar müəllimə müraciət etdik və o, məktubumuza müsbət cavab verdi. Artıq layihəyə pul ayrılmasıyla bağlı göstəriş də verilib”.
Eyni zamanda bu gün Qulu Ağsəsin əlli illik yubileyidir. O, 50 yaşın ağrılarından da danışdı:
“Biz tənqidçi Vaqif Yusifliylə eyni gündə anadan olmuşuq. Vaqif müəllimin 71, mənim isə 50 yaşım olur. Adam bilmir ki, bu yaşa nə vaxt gəlib çıxır. Təbriklərə baxanda özümü rahat hiss edirəm, amma necə ki, 50 rəqəmini görürəm elə bilirəm ki, söhbət ayrı adamdan gedir. İndi adamın 49 yaşına paxıllığı tutur, çünki 49-un içində 50 yoxdur. Həyatımı pis-yaxşı necə yaşamışamsa, heç nədən narazı deyiləm. Nə olubsa olub, nə olacaqsa, o da olacaq”.
