Türkiyə Silahlı Qüvvələrinin Münbiç və Fərat çayının şərqində həyata keçirməyi planlaşdırdığı əməliyyata hazırlıqlar böyük ölçüdə tamamlanıb.
Müstəqil.az “Yeni Şəfəq” nəşrinə istinadən xəbər verir ki, 80 min hərbçi hücum əmrini gözləyir.
Bu rəqəm, 1974-cü ildə Kipr əməliyyatında iştirak edən hərbi qüvvədən iki dəfə çoxdur. Türkiyə Cümhuriyyəti tarixində ən böyük əməliyyat Şanlıurfa və Kilis vilayətlərindən idarə olunacaq. “Mehmetcik” eyni anda 10-dan çox nöqtədən hücuma keçəcək.
Hədəf təxminən 30 min kvadrat kilometr ərazini terror təşkilatlarından təmizləyərək “terror dəhlizi” təhdidini tamamilə aradan qaldırmaqdır.
Qeyd edək ki, Türkiyənin əməliyyata hazırlıqları tamamlaması əməliyyatın əleyhinə olan ABŞ-a meydan oxuması anlamına gəlir. Xatırladaq ki, Donald Tramp Suriyanın şimali-şərqində kürd qruplaşmalarının (PYD/YPG terror təşkilatı –red.) mövqelərinə hücüm edəcəkləri halda, Türkiyəyə iqtisadi zərbə vurulacağını bildirib.
