Rusiyanın Tomsk vilayətinin Molçanovo kəndində himayədar ailədən olan altı yaşlı uşaq döyülərək ağır vəziyyətdə xəstəxanaya yerləşdirilib.
Bu barədə Rusiya Federasiyası İstintaq Komitəsinin Tomsk vilayəti üzrə İstintaq İdarəsi məlumat yayıb.
Hadisə avqustun 30-da baş verib, altı yaşlı qız çoxsaylı döyülmələrlə ağır vəziyyətdə yerli xəstəxanaya yerləşdirilib. İstintaqın məlumatına görə, zərərçəkmiş himayədar ailədə böyüyüb. Uşağın döyülməsində qadın qəyyum şübhəli bilinir.
Məlumdur ki, ailə yeddi azyaşlı – qəyyumun iki doğma övladı və beş övladlığa götürülmüş uşaq böyüyüb.
“Bu qadın onun qollarını qatlayıb, boynunu fırladırdı, hətta onun belini əyib bütün ağırlığını ona söykəyirdi. O, bunu masaj adlandırırdı”, – deyə zərərçəkmiş qızın övladlığa götürülən böyük qardaşı bildirib.
O, həmçinin əlavə edib ki, övladlığa götürən ana uşaqların hamısını amansızcasına cəzalandırıb, soyuq duşun altına salıb, kəmərlə döyüb, yeməksiz qoyub.
Rusiyanın Tomsk vilayətinin İstintaq Komitəsi iki cinayət – uşaqların tərbiyə edilməsi üzrə öhdəliklərin yerinə yetirilməməsi və ehtiyatsızlıqdan uşağa ağır zərər vurmaq faktı üzrə işi açıb. Hadisənin baş verdiyi şərait müəyyənləşdirilir, qəyyumluqda olan bütün uşaqlar ailədən götürülüb.
Mənbə: gazeta.ru
