“Qaşınmayan yerdən qan çıxarmağa ehtiyac yoxdur, hər şey şəffafdır…”

Yazıçı Cəlil Cavanşir Azərbaycan Yazıçılar Birliyi tərəfindən hər il yazıçılara verilən illik təqaüd sistemini sərt tənqid edib. C.Cavanşir bildirib ki, taqüd ancaq AYB-nin üzvü olan yazıçı və şairlərə verilir, amma qurumun üzvü olmayan yazıçılar təqaüd almır. Bununla yanaşı C.Cavanşirin fikirinə görə təqaüd alanların çoxu ciddi ədəbiyyatla məşğul olan adamlar deyil və bu günə kimi onların bir dənə də olsun əsəri ictimaiyyətə təqdim olunmayıb.
Məsələylə münasibət bildirən Azərbaycan Yazıçılar Birliyinin Gənclər üzrə katibi, şair Rəşad Məcid Moderator.az-a açıqlamasında dedi ki, təqaüd yalnız AYB-nin üzvü olan yazıçılara verilir və C.Cavanşir təqaüd istəyirsə, o, da quruma üzv olsun:
“Cəlil Cavanişirin bu açıqlamasını oxumamışam, xəbərsizəm. Amma onu deyim ki, Azərbaycan Yazıçılar Birliyinin təqaüdləri may ayının sonunda Mədəniyyət Nazirliyi tərəfindən təsdiq olunur və bundan sonra ictimaiyyətə təqdim oluna bilər. Qaldı ki, Cəlil AYB-nin üzvü deyil və vaxtında üzv olsaydı, o, da bir çox yazıçılar kimi təqaüd ala bilərdi. Bizdə qayda budur, neyləmək olar ki, təqaüd yalnız AYB-ə üzv olanlara verilir. Hər il Azərbaycan Yazıçılar Birliyində təqaüd almaq istəyən kifayət qədər yazıçı olur. Əgər söhbət cavanlardan gedirsə, siyahı təqdim olunanda Cəlil Cavanşir Ömər Xəyyama sübut edər ki, Ömər ciddi ədəbiyyatçıdır, yoxsa özü. Mənə elə gəlir ki, qaşınmayan yerdən qan çıxartmağa da ehtiyac yoxdur və hər şey şəffafdır”.
Share: