Özbəkistan Konstitusiyasına əlavə və dəyişikliklərlə bağlı referendumda səsvermə bütün respublika üzrə başa çatıb.
Ölkədə yerli vaxtla saat 8:00-dan 20:00-a qədər (Bakı vaxtı ilə saat 7:00-dan 19:00-a qədər) 10,7 mindən çox seçki məntəqəsi fəaliyyət göstərib.
Bundan əlavə, Özbəkistanın 39 xarici dövlətdəki diplomatik və digər nümayəndəliklərində 55 seçki məntəqəsi yaradılıb.
Özbəkistan Mərkəzi Seçki Komissiyasının (MSK) açıqladığı son məlumata görə, saat 17:00-dək referendumda seçici fəallığı 81,39% təşkil edib. Qeyd edək ki, ölkədə exit-poll keçirilmir. Özbəkistan MSK-nın seçici fəallığının və səsvermənin ilkin nəticələri barədə məlumatı bazar ertəsi açıqlayacağı gözlənilir. Referendumun rəsmi nəticələri plebisitdən 10 gündən gec olmayaraq dərc edilməlidir.
Mənbə: TASS
14:35
Özbəkistanda konstitusiyaya dəyişikliklərlə bağlı referendum keçirilir.
Yerli vaxtla saat 13:00-a (Bakı vaxtı ilə 12:00) qədər seçici siyahılarına daxil edilmiş ölkə vətəndaşlarının yarıdan çoxu seçki məntəqələrində səs verdiyi üçün referendum baş tutmuş elan edilib.
Bu barədə bazar günü jurnalistlərə ölkənin Mərkəzi Seçki Komissiyasının (MSK) sədr müavini Bəhrom Kuçkarov məlumat verib.
“Saat 13.00-a olan məlumata görə, seçicilərin sayı 12 083 105 nəfərə çatıb ki, bu da siyahılara daxil edilmiş vətəndaşların sayının 62,24%-ni təşkil edir. Bu o deməkdir ki, MSK-nın referendumu keçərli saymaq üçün əsası var”, – Kuçkarov brifinqdə deyib. O qeyd edib ki, seçici siyahılarına 19 milyon 414 min 914 ölkə vətəndaşı daxil edilib.
Xatırladaq ki, Özbəkistanda konstitusiyaya dəyişiklik edilməsi ilə bağlı referendum ölkə prezidenti Şavkat Mirziyoyevin təşəbbüsü ilə keçirilir. 1992-ci ildə qəbul edilmiş sənədə 200-ə yaxın dəyişikliyin edilməsi nəzərdə tutulur. O cümlədən, maddələrin sayının 128-dən 155-ə, konstitusiya normalarının sayının isə 275-dən 434-ə çatdırılması, ümumilikdə, əsas qanunun 65 faiz yenilənməsi təklif edilir.
Əsas əlavələrdən biri ölkə prezidentinin səlahiyyətlərinin 5 ildən 7 ilə uzadılması ilə bağlıdır. Dəyişikliyə əsasən, hazırkı dövlət başçısı Mirziyoyevin səlahiyyətləri sıfırlanacaq, yəni 2026-cı ildə o, üçüncü dəfə namizədliyini irəli sürə biləcək.
Bundan əlavə, düzəlişlərə əsasən, Özbəkistan sosial dövlət elan ediləcək və ölkədə ölüm hökmü ləğv olunacaq.
Mənbə: TASS
