İlaxır çərşənbələrin ikincisi, el arasında üskü çərşənbə, addı çərşənbə adlandırılan od çərşənbəsinin gəlişi Lənkəranda bütün təmtərağı ilə, elliklə qeyd edilib.
Şəhərin vağzalyanı meydanında Novruzun rəmzləri olan Kosa ilə Keçəlin qaladığı tonqalın işığına, istisinə bütün Lənkəran yığışıb. El adətincə qalanan ocağın işığında oxunan nəğmələr, keçəllə kosanın zarafatları, şux rəqslər mərasimə əsl şadlıq, bahar ovqatı qatıb.
İlaxır çərşənbələrin elliklə qarşılanması xalqın birliyini, doğmalığını əks etdirir. Bahar – bayram sevincini birgə bölüşmək istəyi isə əski inancların gələcək nəsillərə ötürülməsində əvəzsiz rol oynayır.
Şəhər sakinləri bahar – bayram ovqatlarını bizimlə də bölüşüblər.
Ömrünün 85–ci baharını yaşayan Lənkəran Rayon Ağsaqqallar Şurasının Sədr müavini Sərhad Məmmədov bildirib ki, Novruz çərşənbələri baharın gəlişini müjdələyir. “Oddur, sudur, küləkdir, torpaqdır – bunlar birlikdə təbiəti canlandırır.”
Şəhər sakini Nuranə İbrahimovanın fikrincə, çərşənbə axşamlarından ən müqəddəsi od çərşənbəsidir: “Çox sevinirəm, Allaha şükürlər edirəm ki, növbəti bayram tonqalını görmək bizə qismət oldu. Bütün ailələrə ruzi-bərəkət bolluq sevinc arzu edirəm. Ocaqlarınız gur yansın, bolluq, bərəkət, sülh olsun deyirəm!”.
Bayram iştirakçılarının cəngi sədaları altında xalqın birliyinin rəmzi kimi əl-ələ verib yallı getməsi bayrama həm əlvanlıq, həm möhtəşəmlik qatdı.
Tədbirə qatılan Lənkəran Şəhər İcra Hakimiyyətinin başçısı Taleh Qaraşov rayon sakinləri ilə bayramlaşaraq onlara ən xoş bayram arzularını çatdırıb, bütün ailələrə sevinc-səadət, yurdumuza sülh və əmin-amanlıq,süfrələrə ruzi və bərəkət arzulayıb.Bildirib ki, Novruz süfrəsi üçün lazım olan bütün növ ərzaqlar bayram gününə kimi davam edəcək yarmarkalarda ucuz və sərfəli qiymətlərlə satışa çıxarılıacaq.
Qeyd edək ki, od şərşənbəsini elliklə qarşılamaq adəti Lənkəranda illərdir ki, davam edir.
Esmira İsmayılova-Lənkəran.
