Nağıllarda deyildiyi kimi, bizim dostluğumuzun göbəyi göylərdə kəsilib.
Özümüzü tanıyandan – dil açıb danışandan, ayaq açıb yeriyəndən bir yerdəyik. Nə qohum deyilik, nə doğma deyilik, amma bunların hamısından ötəyik. Bizi bir-birimizə bağlayan heç bir məcburiyyət yoxdur, amma bir-birimizə ehtiyacdan yaranan dostluq bağlarımız bir insan ömrünə bərabərdir. Uşaq fəhmimizlə seçimimizdə yanılmadıq, inamla, etibarla, sədaqətlə irəlilədik. Qəribədir ki, həyatımızı heç vaxt birlikdə olmaq ehtimalı ilə planlaşdırmadıq. Amma tale bizi həmişə yanbayan addımlamağa sövq etdi.
Əvvəlcə eyni məktəb pillələrində, sonra eyni universitet auditoriyalarında, daha sonra isə eyni iş yerində yollarımız kəsişdi. Həyatımızdan saysız-hesabsız insanlar gəlib keçdi, itirdiklərimiz də oldu, qazandıqlarımız da. Müəyyən səbəblərdən bir müddət aralı da düşdük. Amma dəyişmədik, yadlaşmadıq, sadiqliyimizi itirmədik. Ehtiyacımız olan anda sövq-təbii bir-birimizə doğru can atdıq. Şad gündə də, dar gündə də bir-birimizi tək buraxmadıq. Səsimizin rəngindən hansı əhvalda olduğumuzu dərhal anladıq. Təskinliyimiz yaramıza məlhəm, dualarımız arzularımıza yardımçı oldu.
Bu gün mənim ruh əkizimin, əzizim İlhamiyyənin doğum günüdür. Bu o İlhamiyyədir ki, hər səhər gülər çöhrəsi, mehriban səsi ilə evlərimizin qonağı olur, insanlarda xoş əhvali-ruhiyyə yaradır. Bu o İlhamiyyədir ki, öz zəkası və düşüncəsi ilə telejurnalistikada bir nümunədir. Onun peşəkarlıq məziyyətləri haqqında danışmaq fikrim yoxdur, zatən onu hamı yaxşı tanıyır və sevir. İlhamiyyə Rzanı başqalarından fəqrləndirən əsas cəhət harda çalışmasından asılı olmayaraq onun həmişə ədalət prinsiplərinə sadiq qalmasıdır. Məncə, bu, jurnalist üçün ən ümdə keyfiyyətdir.
İnternet əsri olmasina baxmayaraq, efir İlhamiyyə kimi, Həmid kimi yaradıcı insanların hesabına baxımlı və maraqlıdır. Onlar olan yerdə yenilik var, uğur var.
Dəyərli dostum! Yeni yaşın mübarək! Səsin həmişə zirvələrdən gəlsin!
İradə Kərimli
(redaktor AZTV)
