(Mina Rəşidin uşaq şeirləri)
NOVRUZ BAYRAMI
Bayramların içində
Biri var o ayrıdır.
Biz onu çox sevirik
O Novruz bayramıdır.
Bəzəkli yumurtalar
Döyüşə hazır olar.
Tonqalların üstündən
Ən qoçaqlar atlanar.
Stolun üstündəki
Səmənidir ən uca.
Şəkərbura, paxlava,
Şirni, noğul bolluca.
Qızlar qapı yanında
Qulaqlarını tutar.
Qonşular qoz-fındığı
Papaqlara doldurar.
…Nənəm Qarabağdakı
Novruzundan danışar.
Susar bütün uşaqlar
Qəlbimizdə bir həsrət
Tonqal kimi alışar.
XOCALI
Xocalı qan ağlayır,
Ürəyimi dağlayır.
Qərənfil də bizimtək
Dərd çəkir, yas saxlayır.
Amma biz ağlamaqla
Bu dərd sağalan deyil.
Xocalını almasaq
Bir də doğulan deyil!