Posted in Kateqoriyasız “Götürün o qandalı, Vurun nəfəs yoluma…”-Gənc şair Aqil Altunun şeirləri… Müstəqil AZ 19:03 / 21 Dekabr 2018 Leave a comment Müstəqil.Az istedadlı,gənc şair Aqil Altunun şeirlərini təqdim edir: Azərbaycanam Mənim azad dilim var Qandal neylər qoluma?! Götürün o qandalı Vurun, nəfəs yoluma nəfəsim bəlkə durdu. Ulduzlardan bir ordu bəs edərmi?! Yox! Etməz! Cismimi qəsb etməyə Ruhumu həbs etməyə Dünya boyda bir zindan Günəş boyda qıfıl var? Göy-bayrağım. Üstü qan Göy-bayrağım Üstə can Üstə günəş var, ay var Mənim nifrətimdə qış məhəbbətimdə yay var Əsgərimin səngərdə tətikdəki barmağı hədəf alan gözüyəm Dünyanın ağ üzüyəm Türkün ata ocağı Türkün ana yurdu-Mən Azadlıq Bozqurdu-Mən Nə qədər zülmət ola şaşmamışam yolumda Sağımda Solumda Həmişə mən olmuşam Bəzən aydın səmalı bəzən də çən olmuşam Bir ananın qəlbində övladı boyda dağam Bir şəhidin qanıyla qüsullanmış torpağam Mən dünyanın özündə özü boyda bir canam Bu dünyaya iftixar Bu dünyaya bir şanam Türkün ana vətəni Qədim AZƏRBAYCANAM.. KƏND QIZI Gəl qayıdaq kəndinizə, kənd qızı, Bu şəhərin havası çox ağırdı. Daim əsir burda acı küləklər, Orda şirin-şirin yağış yağırdı. Orda dərd bir,sevinc isə beş olur, Adamları çox mehriban, xoş olur. Küçələri dar olsa da boş olur, Buraların enli yolu cığırdı. Şəhər bizə doğma deyil ki, yaddır, Bu şəhərin havası da boyatdır. Kənd həyatı ,quzum ,gözəl həyatdır – Kənddə günəş bir başqa cür doğurdu. Gün çıxmamış qalxıb yuxa yayırdın Bişirirdin, masa üstə qoyurdun. Doğrayırdım südə, yeyib doyurdum – Səhər-səhər anan inək sağırdı. Gəl qayıdaq kəndinizə, kənd qızı, Bu şəhərin havası çox ağırdı. Tut əlimdən, çıxaq gedək şəhərdən, Atan-anan bizi kəndə çağırdı. Qadın ahı Mənim sevdiyim məsumdur, Günahımsa çox..,ilahi! Mənə qıyma ,ağır olur, Tutar səni qadın ahı. Elə tutar heç buraxmaz, Tutar sənin ətəyindən. Vallah sənə imdad olmaz israfilin tütəyindən Bir qiyamət qoparar ki, Qiyamətdə qiyam düşər. Bir ah çəkər yana-yana, Cəhənnəmin orda bişər. Mələklərin asi olar, Üz döndərib gedər səndən. O qadının saçlarına düşən dəndən- Sən deyərsən olmaz,yemə! Həvva yedirər Adəmə Etmə belə etmə allah, Dünya səndən dönük düşər. Qadın ahı göyə qalxsa, Günəş göydən sönüb düşər. Bir insanı öldürməkçün Kainatı məhv eləmə Mənim səhvim özüm boyda, Özün boyda səhv eləmə… GÜNAH Mənəm günahın içində- Yoxsa günah içimdədir?! Çoxmu böyükdür günahım?! Nə boyda, nə biçimdədir?! Bəlkə də heç günah deyil Günahımın cəzasıdır Gecikmiş bir məhəbbətin Sevilməmiş qəzasıdır Günahım sevgim qədərdi Sevgim ürəyim boydadı Eşq əzabı dünya boyda Dünya kürəyim boydadı Yığın dünyanın dərdini- kürəyimə, daşıyaram Qarışmayın ürəyimə Günahımla yaşayaram