Mənsurə Qaçayqızı
Vaxtında gəlməyən sevinc…
Səni gözləyirdim,
heç kimin
gözləmədiyi kimi…
Heç kimin
gözləyə bilmədiyi kimi,
bunu sən də bilirdin,
elə deyilmi?
Gəlişini gözlədiyimə sevinirdim,
heç vaxt sevinmədiyim kimi,
bunu da bilirdin,
elə deyilmi?
Gəlmədin …
O zaman gəldin ki,
artıq gözləməkdən
marağım itmişdi sənə,
İndi məni təccübləndirməyə
cəhd göstərmə.
Gəlişinə sevinən deyiləm,
vaxtında gəlməyən sevinc…
Sözüm var
Sənə deyiləsi o qədər sözüm var,
bir yığın, qucaq-qucaq…
Səhərədək yanında qalsam,
görən,
sabah tezmi açılacaq.
Sənə deyiləsi sözlərim çox…
Yerdə həmdəmim sən
mavi dalğalı dəniz.
Başımın üstündə o,
mavi səma,
hüdudları geniş,
nəhayətsiz.
Hərdən qibtə edirəm sizə.
Bir-birindən doymayan
mavi gözlərinizə.
Çoxmu qısqanır?
Necə dözür nazlı yarın ədasına,
hikkəsindən əsib-coşan dalğasına.
Bəs sən?!
Anladım.
Baxışlarınız toqquşanda,
göy gurultusu, ildırım əsi,
mavi gözlərin göz yaşı…
Sonunda barışa sevinən
qarı nənənin al-əlvan ipləri.
Göy qurşağı mənzərəsi.
Sənə söz deməyə də qorxuram.
Qorxuram,
həmdərd olasan mənə,
Alarsan məni qoynuna.
Qorxuram onda,
bax onda
buludlar qaşqabağın açmasın.
Qorxuram onda
mavi gözlərin
göz yaşı qurumasın.
Qarı nənə iplərini tapmasın.
Amma, sənə deyiləsi
o qədər sözüm vardı ki…
Kaş ki
Saçımdan ayrılan tel
gözlərimin önündə
yellənir
belədən belə,
elədən elə.
Saçımdan ayrılan tel
düşüb gedir ömrümə.
Kaş ki,
mənə xəyanət etməyə.
Getmək istədiyim yerə
gedə,
görmək istədiyimi
gətirə…
Qış günəşi
Sevgin elə bil ki, qış günəşiydi
Sığalın könlümə çəkdi də getdi.
Könlüm nə üşüdü nə də isindi
Özü də bilmədi bəlkə nə etdi.
Göylərin gözündə axtardım səni,
Birdə yanacaqsan ömrümdə deyə.
Bəzəndə özümü biraz qınadım,
Səndən yaz nəfəsi umurdum niyə?
Olar
Qatar gedər
sərnişini qalar.
Sevda bitər
göz yaşı qalar.
Ulduz ötər
naxışı qalar
Insan gedər
baş daşı qalar
Başdaşının baxışları
daha soyuq olar…
Sənə əmanət…
Yağış döyən oturacaq,
çətirimi
sənə bağışlayıb gedirəm.
Çətirimin xatirələri
sənə əmanət…
Sizə gəlirəm…
Yaşadığım,
yaşamaq istədiyim
və yaşamaq istəmədiyim,
unutmağa çalışdığım illər…
Yaşadığım və
onların arasında
unutmağa çalışdığım illər
SİZ varsınız…
Yaşamaq istədiyim illər,
SİZ sualsınız…
Sualı çox sevirəm,
Bir qucaq sual götürüb
SİZƏ gəlirəm…
Amma…
Yumruq atdı yurddaşına,
Yumruq atdı qan qardaşına.
Şəhərin ortasında,
Adamların
gözü qarşısında.
Keçməmişdi
boğazlarından bir-birinin sözü,
qana qərq etdilər bir-birini.
Heyfim gəldi,
arıq,
qaragöz oğlanın
gücünə.
Cavabını verə bilərdi
təkbaşına bir neçə düşmənin…
Amma …
Bu gün qolu qandallanacaq
bir Vətən oğlunun,
gözləri ağlayacaq bir ananın,
sevən ürəyinin teli titrəyəcək
bir Vətən qızının.
Bu gün
şəhid ruhu endi yer üzünə, kədərliydi baxışları,
deyiləcək sözləri vardı…
Yaza bilmədim
İstədim
bir sevgi şeiri yazım,
Sevməyənlər sevsin,
Sevənlər,
istəyir sevgidən
bax,
elə beləcə ölsün…
İstədim
bir sevgi şeiri yazım,
Həsrətdən, hicrandan xəbərsiz,
Ahsız, naləsiz, kədərsiz…
Lap elə
vüsalın qollarında,
Ayrılıq olmasın, qoy,
Bu sevginin sonunda…
Dayan, kimə oxuyacam?!..
Ətrafda,
sevgi həsrətli gözlər gördüm…
İstəyirdim,
sevgi şeiri yazım,
Məni qınamayın,
yaza bilmədim
Cinayət...
Ürəyin doğum şöbəsi,
səssizlik.
Həkimin əllərində cərrah bıçağı,
İçinə axan göz yaşları.
Qarşısında
sevgi adlı xəstənin
yenicə doğulmuş körpələri.
Əkizlər,siam əkizləri:
məhəbbət və nifrət.
Birinin yaşama ehtimalı var!
Ürəyin doğum şöbəsi,
cinayət..
