Azərbaycan xalqının taleyində silinməz iz qoymuş şəxsiyyətlər vardır ki, onların adı tarixlə birgə çəkilir. Belə böyük şəxsiyyətlərdən biri də Azərbaycan xalqının Ümummilli Lideri Heydər Əliyev olmuşdur.
Onun həyatı və fəaliyyəti xalqına xidmət nümunəsi, dövlətçilik məktəbi və milli qürur mənbəyidir. Ulu Öndərin 103 illiyi münasibətilə onun zəngin siyasi fəaliyyətinə nəzər salmaq, Azərbaycan dövlətçiliyinə verdiyi misilsiz töhfələri yada salmaq hər bir azərbaycanlının mənəvi borcudur.
Heydər Əliyev yalnız bir siyasətçi deyildi. O, xalqının gələcəyini düşünən böyük dövlət xadimi, uzaqgörən rəhbər, milli ideologiyanın müəllifi və müstəqil Azərbaycanın qurucusu idi. Onun adı Azərbaycan dövlətinin qüdrətlənməsi, xalqın rifahı və milli birliyin möhkəmlənməsi ilə ayrılmaz şəkildə bağlıdır. Ulu Öndərin siyasi fəaliyyəti sübut etdi ki, xalqını sevən lider zamanın ən çətin sınaqlarından belə alnıaçıq çıxmağı bacarır.
Heydər Əliyev 1923-cü il mayın 10-da Naxçıvanda anadan olmuşdur. Kiçik yaşlarından elmə və biliyə böyük maraq göstərən gələcək lider daim zəhmətsevərliyi ilə seçilmişdir. Onun həyat yolu əzmkarlığın, iradənin və vətən sevgisinin parlaq nümunəsidir. Gənclik illərindən etibarən dövlət idarəçiliyində çalışan Heydər Əliyev qısa müddətdə böyük nüfuz qazanmışdır. O, məsuliyyətli və prinsipial rəhbər kimi tanınmışdır.
1969-cu ildə Heydər Əliyevin Azərbaycana rəhbər seçilməsi ölkənin həyatında dönüş nöqtəsi oldu. Həmin dövrdə Azərbaycan iqtisadi, sosial və mədəni sahələrdə müəyyən çətinliklərlə üzləşirdi. Lakin Ulu Öndərin uzaqgörən siyasəti nəticəsində respublikada böyük inkişaf mərhələsi başlandı. Yeni zavodlar tikildi. Kənd təsərrüfatı inkişaf etdi. Təhsil və elm sahəsinə xüsusi diqqət ayrıldı. Minlərlə gəncin SSRİ-nin nüfuzlu ali məktəblərinə göndərilməsi gələcəyin milli kadrlarının yetişməsinə zəmin yaratdı.
Heydər Əliyev milli ruhun qorunmasına xüsusi önəm verirdi. O, Azərbaycan dilinin inkişafı uğrunda böyük mübarizə aparmışdır. Həmin dövrdə Azərbaycan dilinin dövlət dili kimi qorunması və inkişaf etdirilməsi milli şüurun güclənməsində mühüm rol oynadı. Ulu Öndər yaxşı bilirdi ki, dilini qoruyan xalq öz milli kimliyini də qoruyur.
Azərbaycanın müstəqillik qazandığı ilk illər xalqımız üçün çox ağır və mürəkkəb dövr idi. Ölkədə siyasi böhran, iqtisadi çətinliklər və vətəndaş qarşıdurması hökm sürürdü. Ermənistanın Azərbaycana qarşı apardığı işğalçılıq siyasəti vəziyyəti daha da ağırlaşdırmışdı. Belə bir zamanda xalq öz xilaskarını yenidən hakimiyyətə dəvət etdi. 1993-cü ildə Heydər Əliyevin yenidən siyasi hakimiyyətə qayıdışı Azərbaycan tarixində dönüş yaratdı.
Ulu Öndər ölkədə sabitliyi bərpa etdi. Dövlətçiliyin məhv olmaq təhlükəsinin qarşısını aldı. Ordunun formalaşdırılması istiqamətində mühüm addımlar atıldı. Qanunsuz silahlı dəstələr zərərsizləşdirildi. Azərbaycan beynəlxalq aləmdə öz nüfuzunu bərpa etməyə başladı. Xalq gələcəyə ümidlə baxmağa başladı.
Heydər Əliyevin həyata keçirdiyi neft strategiyası Azərbaycanın iqtisadi inkişafında mühüm mərhələ oldu. “Əsrin müqaviləsi” adlandırılan beynəlxalq neft sazişi ölkəmizin dünya iqtisadiyyatına inteqrasiyasını sürətləndirdi. Xarici sərmayələrin Azərbaycana cəlb olunması iqtisadi dirçəlişə yol açdı. Bu siyasət nəticəsində Azərbaycan regionun ən güclü dövlətlərindən birinə çevrildi.
Ulu Öndər yalnız iqtisadiyyat sahəsində deyil, təhsil, mədəniyyət və mənəviyyat sahələrində də böyük xidmətlər göstərmişdir. O, gənclərin vətənpərvər ruhda yetişməsinə xüsusi diqqət ayırırdı. Heydər Əliyev dəfələrlə qeyd edirdi ki, gələcəyin taleyi savadlı və milli ruhlu gənclərdən asılıdır. Bu gün Azərbaycan gəncliyinin qazandığı uğurlar həmin siyasətin nəticəsidir.
Heydər Əliyev xalqını sonsuz məhəbbətlə sevirdi. O, hər zaman xalqın yanında olurdu. Sadə insanlarla səmimi münasibəti, onların problemlərinə həssas yanaşması Ulu Öndərə olan sevgini daha da artırırdı. Xalq da öz böyük liderinə sonsuz hörmət və ehtiram bəsləyirdi. Bu sevgi zaman keçdikcə daha da böyüyür və möhkəmlənir.
Azərbaycanın bu günkü inkişafı Heydər Əliyev siyasətinin uğurlu davamının nəticəsidir. Müstəqil dövlətimizin güclənməsi, beynəlxalq nüfuzunun artması və torpaqlarımızın azad olunması Ulu Öndərin müəyyən etdiyi siyasi kursun təntənəsidir. Bu gün Azərbaycan xalqı böyük qürur hissi ilə Heydər Əliyevin ideyalarına sadiq qalır.
Ulu Öndərin həyat yolu hər bir insan üçün örnəkdir. O, öz ömrünü xalqına və dövlətinə həsr etmişdir. Çətinliklər qarşısında əyilməyən, daim xalqını düşünən bu böyük şəxsiyyət Azərbaycan tarixində əbədi yaşayacaqdır. Çünki xalqını sevən və xalqı tərəfindən sevilən liderlər heç zaman unudulmur.
Heydər Əliyevin 103 illiyi yalnız bir yubiley deyil. Bu tarix Azərbaycan dövlətçiliyinin, milli birliyin və müstəqilliyimizin təntənəsidir. Ulu Öndərin əziz xatirəsi daim hörmətlə anılır. Onun ideyaları və siyasi məktəbi gələcək nəsillərə işıq saçır. Azərbaycan xalqı fəxr edir ki, onun tarixində Heydər Əliyev kimi dahi şəxsiyyət yaşamışdır.
Ruhu şad olsun böyük liderin. Xatirəsi daim qəlblərdə yaşayacaqdır.
✍ Sevil Azadqızı
10.05.2026
