Narıngül

Hər şey tərsinə dönür

Bir az ağıllı olduq,
Bir az da dəli kimi.
Ömür də hesabatdır,
Vurma cədvəli kimi.

Hər şey tərsinə dönür,
Qaranın ağı kimi.
Bir qız saçını yolur,
Söyüd budağı kimi.

Bir quş təyyarə kimi,
Uçur göyün üzündə.
Bir gəmi batıb qalıb,
Ayrılıq dənizində.

Sıxır səni adamlar,
Metronun basabası.
Sonuncu dayanacaq-
Ümid stansiyası.

Şeirin Bədii Təhlili:

Narıngül Babayevanın təqdim olunan şeiri insan ömrünün təzadlarını, daxili böhranlarını və tənhalığını lakonik obrazlarla ifadə edən müasir fəlsəfi-psixoloji lirikadır.
Ömür yolu, zamanın sürətlə axması və insanın cəmiyyət daxilindəki tənhalığıdır. Həyatın ziddiyyətlərdən ibarət olması və hər bir çətinliyə rəğmən son ümidin itməməsidir.
Həyatın dəqiq, amansız və sürətli hesabatı riyazi simvolla paralelləşdirilir.
“Ağıllı-dəli” və “qara-ağ” qarşıdurması qəhrəmanın daxili dünyasındakı xaosu göstərir.
Saçını yolan qızın “söyüd budağına” bənzədilməsi kədərin vizual və təbii təsviridir.
“Metronun basabası” müasir şəhər həyatının insanı sıxan, yadlaşdıran mexaniki mühitini simvolizə edir.
Şeirdəki müqayisələr xüsusi dinamika yaradır:…vurma cədvəli kimi…qaranın ağı kimi…söyüd budağı kimi…təyyarə kimi
“Ayrılıq dənizi” və “Ümid stansiyası” ifadələri duyğuların coğrafi və məkan simvollarına çevrilməsidir.
Şeir sadə, axıcı və anlaşıqlı dildə yazılmışdır.Hər bənddəki müqayisələr, yəni “kimi” qoşması ilə ritmi tənzimləyir və assosiativ düşüncəni gücləndirir.
Şeir pessimist notlarla, yəni batma, sıxılma irəliləsə də, “Ümid stansiyası” ilə bitərək oxucuda nikbin bir sonluq hissi buraxır.
Sizə cansağlığı və bütün işlərinizdə uğurlar arzulayıram, əziz Narıngül xanım!

✍ Sevil Azadqızı
Azərbaycan dili və ədəbiyyatı müəllimi. Filoloq.

Ədəbi təhlil-tənqidçi. AJB-nin üzvü. Yazar-publisist
08.05.2026