Mətbuat Şurasının sədri, deputat Əflatun Amaşovun Bakı Dövlət Universitetinin Jurnalistika fakültəsinin tələbələri ilə növbəti görüşü keçirilib.
Müstəqil.Az bildirir ki, dekan Vüqar Əliyev Mətbuat Şurası ilə əməkdaşlıq məsələləri, o cümlədən birgə layihələrin reallaşdırılması perspektivlərini müzakirə edib.
Əflatun Amaşov təmsil etdiyi qurum ilə Jurnalistika fakültəsi arasında uğurlu əməkdaşlıq əlaqələrinin qurulduğunu qeyd edərək yeni layihələrin həyata keçiriləcəyinə əmin olduğunu vurğulayıb.
Sonra Mətbuat Şurasının sədri tələbələrə “Beynəlxalq jurnalist təşkilatları” mövzusunda mühazirə oxuyub.
O, informasiya vasitələrinin bugünkü durumunu, tarix və müasirlik prizmasından jurnalistlərin mövqeyini və vəzifələrini dəyərləndirib.
Mühazirədən sonra mövzu ətrafında fikir mübadiləsi aparılıb və tələbələrin çoxsaylı sualları cavablandırılıb.
Görüşdə Jurnalistika fakültəsinin professorları – Cahangir Məmmədli və Akif Rüstəmov iştirak edib.
