Onun qələmi Vətəni sevdirən, insanı düşündürən, sevgini ülviləşdirən və zamanın sınaqlarından üzüağ çıxan sözün ünvanı idi. O, poeziyanı sadəcə ədəbi janr deyil, həyatın özü hesab edirdi. Buna görə də “Gəlimli-gedimli dünya”, “Bir az möhlət istəyirəm ömürdən”, “Fikir eləmə”, “Taleyin töhfəsi”, “Can Azərbaycan” və digər əsərləri bu gün də öz aktuallığını qoruyur.

Mənim də Nəriman Həsənzadə ilə bağlı unudulmaz bir xatirəm var.

2014-cü ilin dekabr ayı idi. Həmin dövrdə “Aktual.az” xəbər saytında jurnalist kimi fəaliyyət göstərirdim. Gənc jurnalist həvəsi ilə Xalq şairindən müsahibə almaq istəyirdim. Bu məqsədlə onunla görüşdüm və istəyimi bildirdim.

Nəriman müəllim həmişəki təmkin və səmimiyyəti ilə dedi:

“Vaxtım çox azdır. Bir gün geniş vaxt seçərsən, rahat oturarıq, uzun-uzadı söhbət edərik, onda müsahibəni alarsan.”

Bu cümlə o zaman mənə sadə bir təklif kimi görünmüşdü. Düşünürdüm ki, qarşıda çox zaman var və həmin görüş mütləq baş tutacaq.

Amma həyat hər zaman insanın planlaşdırdığı kimi olmur.

2015-ci ilin yanvar ayında hərbi xidmətə yollandım. Vətən borcumu başa vurduqdan sonra isə həyat məni tamam başqa istiqamətə apardı. Jurnalistikadan uzaqlaşdım, dənizçilik sahəsini seçdim və taleyim Xəzərin sonsuz üfüqləri ilə bağlandı.

İllər keçdi…

O planlaşdırdığım müsahibə isə heç vaxt baş tutmadı.

Bu gün geriyə baxanda anlayıram ki, bəzən insan həyatında ən qiymətli söhbətlər məhz edilməyən söhbətlər olur. Cavabı alınmayan suallar illər sonra daha ağır yükə çevrilir.

Nəriman Həsənzadə öz yaradıcılığı ilə sübut etdi ki, söz ölmür. İnsan dünyadan köçür, amma onun yazdığı misralar yaşayır. Onun əsərlərində Azərbaycan sevgisi, insan taleyi, vicdan, mərhəmət, zaman və ömür anlayışı xüsusi yer tutur. Elə buna görə də onun poeziyası bu gün də oxunur, sabah da oxunacaq.

Biz jurnalistlər üçün isə belə şəxsiyyətlərlə hər görüş bir məktəb idi. Mən o məktəbdən cəmi bir neçə dəqiqəlik dərs ala bildim. Amma həmin qısa görüş belə yaddaşımdan silinmədi.

Bəzən düşünürəm ki, kaş o müsahibə baş tutsaydı… Bəlkə də bu gün Azərbaycan mətbuatının arxivində Xalq şairi Nəriman Həsənzadənin daha bir səmimi söhbəti yaşayardı.

İndi isə həmin müsahibənin yerini bir xatirə tutur.

Allah Xalq şairi Nəriman Həsənzadəyə rəhmət eləsin. Onun qələmi Azərbaycan ədəbiyyatının ən qiymətli irslərindən biri olaraq yaşayacaq. Çünki böyük sənətkarlar dünyalarını dəyişsələr də, sözləri zamanın yaddaşından heç vaxt silinmir.