Narkoz həkimi
( Yusif Kamal )
Ay həkim, dünyanın qaydasıdı bu,
Ölsəm, yanaqlarda bir damla yaşam.
Bil ki, gözlərinin xatasıdı bu,
Desələr, narkozdan ayılmamışam.
Başqa cür ömrümə gəlməmisən sən,
Bu tale qismətim, yazım deyilmiş.
Həkim olduğunu bilməmisən sən,
Heç sənə oxumaq lazım deyilmiş.
Sənə elm öyrədən o cavan alim,
Qarşında min dəfə imtahan verib.
Yazdılar – xəstədi, bəs filan alim…
Bilən də olmadı niyə can verib.
Ay narkoz həkimi, ay gözəl mələk,
Heyif ki, xərcləndi ömrün yarısı.
Bilmirəm gözəlin nəyinə gərək,
Dünyanın cürbəcür bihuşdarısı.
Həyat bıçaq altda, ürək dözümdə,
Taleyin payına qane olmayaq.
Gözəl, gözlərini saxla gözümdə,
Cərrahın işi var, mane olmayaq…