Moskvanın Biryulevo rayonunda yol münaqişəsi 18 nəfərin tutulması, 3 nəfərin xəstəxanaya düşməsi ilə nəticələnib.
Müstəqil.Az Virtualaz.org-a istinadən xəbər verir ki, hadisə ötən gün axşam saatlarında VAZ və “Mersedes” markalı iki avtomobillərin bir-birinin yoluna çıxması nəticəsində yaranıb. Maşınlar toqquşmadan son anda yayınıb, amma sürücülər dərhal maşından çıxaraq münasibətləri ayrıd etməyə başlayıblar.
Münaqişə çox sürətlə, tərəflərin bir-iki söyüş işlətməsindən sonra əlbəyaxa davaya çevrilib. Sürücülərdən biri travmatik tapançanı işə salıb, o biri yük yerindən çəkic çıxarıb. Sürücülərin davasına sərnişinlər də qarışıblar. Bu vaxt sürücülərdən birinin yaxınlıqdakı ofisdə işləyən dostları davanı görüblər və onlar da münaqişəyə qarışıblar. Dava kütləvi xarakter alıb, tapança və çəkicdən başqa beysbol dəyənəkləri, bıçaqlar və digər kəsici-deşici, küt alətlər işə düşüb. Davanın sonunda üç nəfər ağır xəsarətlərlə xəstəxanaya aparılıb, onlarda kəllə-beyin travmaları, güllə və bıçaq yaraları aşkar edilib.
Polisin məlumatına görə davanın 18 iştirakçısı saxlanılıb. Saxlanılanlardan 8-i Azərbaycan, 7-i Ermənistan, 1-i Gürcüstan vətəndaşlarıdır, ikisi isə Çeçenistan sakinidir.
Davanı kimin başlatdığı araşdırılır.
Müstəqil.Az
1 / 1
