“Bu hücum Ermənistanın boyunu aşan məsələdir, Azərbaycanın yanında olmaq boynumuzun borcudur” – Ərdoğandan Azərbaycana dəstək

“Ermənistan və Azərbaycan arasında davam edən bir sıxıntı var. Əsdadın əsrlər boyunca yerinə yetirdiyi bu vəzifəni yerinə yetirməyə davam edəcəyik. Dost və qardaş Azərbaycana qarşı Ermənistan tərəfindən edilən hücumları şiddətlə qınayırıq.”

Müstəqil.Az Avropa.info – ya istinadən xəbər verir ki, bu sözləri Türkiyə prezidenti Rəcəb Tayyib Ərdoğan Ermənistan silahlı birləşmələrinin Azərbaycanın Tovuz rayonuna hücumlarına münasibət bildirərkən deyib. Ərdoğan Türkiyənin Azərbaycanın yanında olduğunu bəyan edib.

“Son hücum Dağlıq Qarabağ xəttində deyil, iki dövlət arasındakı sərhədlərdə olub və ağır silahlardan istifadə edilib. Azərbaycana yönəlik məqsədli hücum həyata keçirilib. Hadisə Ermənistanın boyunu aşan bir hadisədir. Koronavirusla mübarizədə aciz qalan, vətəndaşları problem içində olan Ermənistan rəhbərliyinin bu addımı ilk öncə erməni xalqına hörmətsizlikdir. Türkiyə, Azərbaycanın haqqına, hüququna yönəlik hər cür hücumun qarşısında yer almaqda əsla tərəddüd etməyəcək. Bütün gücümüzü bu məsələdə səfərbər etmək boynumuzun borcudur. Bütün imkanlarımızla dost və qardaş Azərbaycanın yanında olmağa davam edəcəyik” – Ərdoğan belə deyib.

Müstəqil.Az

Share: