Neftçalada şəhidlərin xatirəsi əbədiləşdirilir: Deputatın dəstəyi ilə

Azərbaycanın ərazi bütövlüyü və dövlət müstəqilliyi uğurunda mübarizədə Neftçala rayonu fəal iştirak etmişdir. 1990-cı ilin yanvarında sovet imperiyasının qanlı ordusunun yeridildiyi bölgələrimizdən biri də Neftçala rayonu olmuşdur. Ötən illər ərzində Neftçala rayonu Vətən uğrunda 200 şəhid verib. Şəhidlərin ruhunu hər zaman əziz tutan Neftçala sakinləri həm pandemiya, həm su qıtlığından irəli gələn bu çətin günlərdə də onların xatirəsini unutmurlar.

Neftçala rayonunun millət vəkili, Vətəndaş Həmrəyliyi Partiyasının sədri Sabir Rüstəmxanlının rayonda növbəti gördüyü iş də şəhidlərin xatirəsinin əbədiləşdirilməsi ilə bağlıdır. Artıq Neftçala rayonunun ilk şəhidi Gözəlov Əfsər Səttar oğlunun Bankə qəsəbə qəbiristanlığındakı məzarının abadlaşdırılması işinə başlanılmışdır. Dəfn olunduqdan sonra yenilənməyən şəhid məzarı üzərindəki işlər bu günlərdə başa çatacaqdır.

Bundan başqa S.Rüstəmxanlının təşəbbüsü və dəstəyi ilə Həsənabad qəsəbəsində şəhidlərin xatirəsinə park salınır. Parkda Həsənabad qəsəbəsindən olan 15 şəhidin xatirə şəkilləri olan lövhə və iki Milli Qəhrəman Məcidov Zakir Nüsrət oğlu və İmanov Samid Gülağa oğlunun büstləri qoyulacaqdır. Həsənabad kəndində də işlərə balanılmışdır və yaxın vaxtlarda parkın istifadəyə veriləcəyi gözlənilir.

 

Tural Balabəyli

 

Share: