Bu gün dənizçilərin peşə bayramıdır. Bu münasibətlə ADXG QSC XDND idarəsinin gəmi kapitanı, Dənizçilərə Sosial Dəstək İctimai Birliyinin sədri, şair, Prezident təqaüdçüsü Faiq Balabəyli ilə müsahibəni təqdim edirik.
– Dənizçilərin peşə bayramıdır, bu gün münasibəti ilə sizi təbrik edirik.
– Çox sağ olun. Mən də sizin saytın yaratdığı fürsətdən yararlanıb, bütün dənizçilərimizi təbrik edirəm. Dəniz işi, dənizçilik şərəfli bir peşədir və bu şərəfli peşənin sahiblərinə ən xoş arzularımı yetirirəm.
– Deyəsən ailənizdə dənizçi tək siz deyilsiz.
– Tək olmadığm, düzdür. Amma ilk dənizçi mənəm. Oğlum Tural Balabəyli də dənizçidir. O, Əvvəlcə Təfəkkür Universitetinin Ümumi İqtisadiyyat və Maliyyə Kredit fakultəsini, sonralar Bakı Slavyan Universitetininn Yaradıcılıq fakutəsini bitirdi. Müxtəlif yerlərə işlədi. O, həm də yaradıcı adamdır, Jurnalistika ilə məşğul oldu, iki şeir kitabının müəllifidir, sözlərinə onlarla mahnı bəstələnib. Hazırda Azərbaycan Dövlət Dənizçilik Akademiyasında (ADDA) 3-cü ali təhsilini başa vurmaq üzrədir. Gəmidə matros vəzifəsində çalışır.
Ondan əlavə, iki qardaşımın oğlu da taleyini dənizə bağlayıb. Toğrul təhsilini başa vursa da, hələ ki işlə təmin olunmayıb. Ülvi isə ADDA-nın ikinci kurs tələbəsidir. Daha iki əmim nəvəsi də həyatlarını dənizə bağlayıblar. Rusiyanın ən böyük dənizçilik akademiyalarında qiyabi təhsil alırlar. Nəvəm Dənizin atası, kürəkənim Fərrux da dənizçidir. ADDA-da ikinci ali təhsilini alır.
– Faiq bəy, siz həm gəmi kapitanı, həm şair-jurnalist, Müstəqil.az saytının sahibi və baş redaktoru, həm də Dənizçilərə Sosial Dəstək İctimai Birliyini sədrisiz. Hansı adla çağrılanda özünüzü rahat hiss edirsiz?
– DSD İB-ni təzə təsis etmişik və qeydiyyatdan yenicə keçib. Yenin olmasına baxmayaraq, bir çox lahiyələrə imza atmışıq, dənizçilərimizin pozulan haqlarının aradan qalxmasında müəyyən işləri şəxsən öz admadan, saytımın nüfuzundan istifadə edib görmüşük. Buna baxmayaraq, qulağım “birlik sədri” sözünə alışmayıb. Mən dənizçiyəm və mənə komandir deyə müraciət olunanda bu sözün məsuliyyətini dərk edirəm. Şairəm, sözə həssasam və oxucularımın sayının çoxluğu, haqqımda yazılan yazıların kifayət qədər olması, şeirlərimin və nəsr əsərlərimin ingilis, alman, ivrit, gürcü, rus, tatar, özbək, qazax, türk dillərinə çevrilməsi, ölkəmizdən çox-çox uzaqlarda dərc olunması heç də pis şair olmadığımdan xəbər verir. Məşğul olduğum bütün sahələrdə özümü rahat hiss edirəm.
– DSD İB-nin yaranması hansı zərurətdən doğdu?
– Bilirsiz, bu İctimai Birlik ona görə yaranmayıb ki, təqvimdə olduğu gündə dənizçiləri yada salıb, onları peşə bayramı münasibəti ilə təbrik etsin. Birliyimizin fəaliyyəti geniş olacaq və dənizçilərimizə doğurdan da sosial dəstək olacağıq, onların hüquqlarını qoruyacağıq. Bu, təkcə Xəzər dənizində üzən dənizçilərə aid deyil, eləcə də dünyanın bütün sularında üzən Azərbaycan dənizçisinin bu birliyi onların güvənc yeri bilmərəinə nail olmağa çalışacağam. Əminəm ki, mən və mənim sədri olduğum bu İctimai Birliyin əməkdaşları buna nail olacaq.
– Bəlkə konkret danışaq, bu gün nələr sizi qane etmir, nəyə görə düşündünüz ki, dənizçilər dövlət qayğısından, donanmanın rəhbərliyinin diqqətdən uzaq olublar?
– Bilirsiz, bütün sahələrdə hansısa neqativ hallar olub və olmaqda davam etməkdədir. Bəzən rəhbərlik heç fərqinə də varmadan istehsalatda hansısa uğura nail olur, amma paralel olaraq hansısa işçisinin işdən, vəzifədən kənarda qarşılaşdığı problemlərdən ya xəbərsiz olur, ya da bu onun heç umurunda da deyil. Baxın, mənim sədri olduğum Birlik həmin dənizçilərə sosial dəstək olmaqla yanaşı, həm də əslində rəhbərliyə də bu istiqamətdə yardımçı olacaq.
Məsələn, Gəmiçiliyin rəhbərliyi son on ildə dənizçilik sahəsində o qədər böyük işlər görüb ki, Məhəmməd Hadi demiş, dənizçilərimizin imzasının imzalar içində olmamasını yox edib. Artıq yeni gəmiqayırma zavodlarımız var. Gəmilərin əsaslı təmiri üçün Finlandiyaya, Polşaya, Keçmiş Yuqoslaviya respublikalarına, Rusiyaya getmələrinə ehtiyac qalmayıb. Daha bu ölkələrin gəmilərini də çox az alırıq, yaxud yaxın gələcəkdə ümumiyyətlə almayacağıq. Öz gəmilərimiz tikilib, dünya sularında üzürlər. Bunlar lap yaxşı. Axı bütün bunları görən bizim Azərbaycan insanıdır və bu qədər böyük işin içərisində olmasın ki, hansısa əmək, hüquq, məişət, sosial pozuntular olmasın. Və Gəmiçiliyin sədrinin öz sözləridir ki, mən bütün bunlardan ola bilsin ki xəbərsiz ola bilərəm və hardasa hansısa işçimin dənizdə olduğu zaman hansısa çətinliyinə yardımçı ola bilmərik. Bu baxımdan DSD İB özünün nizamnaməsindən irəli gələn bütün müddəlarda dənizçilərimizin yanında olacaq, onların maariflənməsində, asudə vaxtlarının səmərəli keçirilməsində çox şeylərə nail olmağa çalışacaq.
– Bir daha sizi və sizin simanızda bütün dənizçilərimizi peşə bayramı münasibəti ilə təbrik edirik.
– Çox sağ olun, biz də sizə təşəkkür edirik. İctimai Birlik yaratmaq ideyası ortalğa çıxandan daima bizə dəstək olmusunuz.
Qaynarinfo
