“Mənsimov ölsə…”

Türkiyənin “Milli Vicdan” Platforması çağırış etdi. Türkiyənin nüfuzlu Qeyri-Hökumət Təşkilatlarını və görkəmli ziyalılarını özündə birləşdirən “Milli Vicdan” platforması azərbaycanli iş adami, xeyriyyəçi, “Palmali” şirkətlər qrunun prezidenti Mübariz Mənsimov Qurbanoğlu ilə bağlı Türkiyənin dövlət başçısı Rəcəb Tayyib Ərdoğana çağırış edib.

Aktual TV-nin məlumatına əsasən, çağırışın mətnində bildirilir ki, Milli Vicdan Platforması adı ilə bu mətnə imza atan ziyalılar Mənsimovun həbsinin Türkiyə-Azərbaycan əlaqələrinə böyük zərər verməsindən narahatlıq duyur, onun həbssiz mühakimə olunmasını lazım bilirlər. Prezident Ərdoğana ünvanlanan çağırış həmçinin Türkiyə Böyük Millət Məclisinin sədri, ədliyyə naziri, MHP sədri Dövlət Baxçalı və müxalifət liderlərinə göndərilib.
Çağırışda vurğulanır ki, bir müddət əvvəl saxlanılan Mübariz Qurbanoğlunun səhhətindəki problemlər getdikcə təhlükəli hala gəlib. “Həbs olunma hadisəsindən sonra Azərbaycan, Rusiya, Avropa, Amerika və Türkiyədəki milyonlarla azərbaycanlı, bu qərara reaksiya göstərərək ictimai mediada “Mubarizə Azadlıq” kampaniyası başladıblar. Bu insanlar Mübariz Mənsimovun böhtana və şərə qurban verildiyinə, bəzi güc mərkəzlərinin bu böhtan kampaniyasını yaratdıqlarına inanırlar. Bu vəziyyət, Türkiyə ilə Azərbaycan arasındakı nümunəvi qardaşlıqdan və əməkdaşlıqdan narahat olan bəzi adamları cəsarətləndirib. Bəzi qonşu dövlətlərin tərəfdarları, Mübariz Mənsimov hadisəsini bəhanə edərək milyonlarla insanın Türkiyəyə təzyiq və hirsini özləri üçün fərsətə çevirməyə çalışırlar”.
Rəcəb Ərdoğanın Türkiyə-Azərbaycan qardaşlığına və əməkdaşlığa böyük əhəmiyyət verdiyini qeyd edən Milli Vicdan Platformasının üzvləri 2009-cu ildə, Türkiyə prezidentinin “Qarabağın işğalı bitmədən sərhəd qapıları açıla bilməz” deyərək, şiddət və müdrikliklə böyük bir fitnənin qarşısını necə aldığını da xatırlayıblar. “Hüquqşünasların fikrincə, ağır xəstə olan Mübariz Mənsimovun həbssiz məhkəməsi milyonlarla Azərbaycan türkünün qəlbini rahatlaşdıracaq. Çağırışda belə deyilir: “Mübariz Mənsimov ölsə, bu iki qardaş arasında inciklik, nifrət, kin və nifaqa səbəb ola bilər. Bizim fikrimiz belədir: Mübariz Mənsimov, iddia olunduğu kimi Fetöçu olsaydı, ölkənin digər xainləri kimi artıq ölkəni tərk etmiş və şirkətlərini əcnəbilərə təhvil verərdi. O, Avropa vətəndaşlığından imtina etmək və Türkiyə vətəndaşlığına üstünlük vermək üçün kifayət qədər vətənpərvər və millətçi bir duyğusuna sahib iş adamıdır. Eyni zamanda, minlərlə tələbəyə təqaüd verən, minlərlə kasıb insana, xüsusən şəhid ailələrinə kömək edən və bir çox imkansız xəstəni müalicə edən xeyriyyəçidir. Azərbaycanın 2-ci Hacı Zeynalabdin Tağıyevi kimi tanınır.” “Milli Vicdan” platforması Türkiyə prezidentinə çağırışını belə yekunlaşdırır: “Biz, ölkəmizdə iş görən iş adamlarına, xüsusən də Ata yurdumuz olan Qafqazdan olan iş adamlarına qarşı bu cür tədbirlərin, Türk Cəmiyyətləri arasında, Anadolu ilə Atayurdu arasında İsmayıl Qaspıralının “Dildə, Fikirdə, İşdə Birlik” tezisinə zərər verəcəyindən narahatıq”.
Müstəqil.Az
Share: