MSK-nın hazırda davam edən iclasında 80 saylı İmişli-Beyləqan seçki dairəsində baş vermiş qanun pozuntularına dair şikayətə baxılır.
Müstəqil.az xəbər verir ki, məsələ barədə məlumat verən MSK katibi Arifə Muxtarova namizədlərin şikayətlərində müşahidəçiliyə imkan verilmədiyini bildirilib.
A.Muxtarova konkret seçki məntəqələrində baş verən pozuntuları sadalayıb.
Deyib ki, araşdırma zamanı qanun pozuntularının bir çoxu araşdırmada öz təsdiqini tapıb. Deyib ki, müşahidəçilərə protokollar təqdim edilməyib.
Arifə Muxtarova bildirib ki, bu dairədə seçicilərin öz iradəsini ifadə etməsi mümkün olmayıb.
MSK katibi qeyd edib ki, bu seçki dairəsi üzrə 49 seçki məntəqəsindən 29-da səsvermənin nəticələri etibarsız hesab edilməlidir ki, bu da seçicilərin 25 faizindən çoxu deməkdir. Onun sözlərinə görə, MSK-nın Ekspert Qrupunun bu dairə üzrə seçkilərin nəticələrinin etibarsız hesab edilməli olduğu qənaətinə gəlib.
A.Muxtarova bu dairədə səsvermənin nəticələrinin etibarsız hesab edilməsinə dair hazırlanan qərar layihəsini oxuyub.
MSK üzvü Şaitdin Əliyev qərar layihəsinin lehinə çıxış edib. MSK katibi Mikayıl Rəhimov da qərarı dəstəklədiyini vurğulayıb.
Müzakirədən sonra bu seçki dairəsində nəticələr ləğv olunub.
