Bu gün Bakı Konqres Mərkəzində Bakı Dövlət Universitetinin 100 illik yubileyi münasibətilə mərasim keçirilib. Prezident İlham Əliyev mərasimdə iştirak edib.
Azərbaycan xalqını Bakı Dövlət Universitetinin 100 illik yubileyi münasibətilə təbrik edən Prezident İlham Əliyev Universitetin kollektivinə gələcək fəaliyyətlərində uğurlar arzuladı. Bakı Dövlət Universitetinin Azərbaycan Xalq Cümhuriyyətinin qərarı ilə təsis edildiyini xatırladan dövlət başçısı vurğuladı ki, bu qərar bir daha Cumhuriyyət qurucularının niyyətini və siyasətini əks etdirir və onların savadsız respublikada gələcəyin qurulmasının mümkünsüzlüyünü anladıqlarını təsdiqləyir.
Prezident İlham Əliyev Bakı Dövlət Universitetinin 100 il ərzində Azərbaycanın hərtərəfli inkişafına böyük töhfələr verdiyini qeyd edərək, Universitetin tarixinə nəzər saldı, 100 il ərzində Universitetin məzunlarının ölkəmizin həyatının müxtəlif sahələrində öz bilik və bacarıqlarını nümayiş etdirdiyini, məzunları arasında görkəmli şəxsiyyətlərin, o cümlədən ulu öndər Heydər Əliyevin də olduğunu qeyd etdi. Ümummilli liderin xalqımız qarşısında misilsiz xidmətlərindən, təhsil sahəsinə böyük diqqətindən danışan dövlət başçısı ulu öndərin hələ sovet dövründə Azərbaycan gənclərinin Sovet İttifaqının aparıcı ali məktəblərində oxuması üçün böyük səylər göstərdiyini və Sovet məkanında buna oxşar təcrübənin olmadığını diqqətə çatdırdı.
Bununla da Azərbaycanın gələcəyi üçün güclü kadr potensialının yaradıldığını, bu kadr potensialının ölkəmizin uğurlu inkişafını təmin etdiyini vurğuladı. Dövlət başçısı Ümumilli liderin Azərbaycanın müstəqilliyi uğrunda attdığı cəsarətli addımlardan, xalqa bağlılığından, ölkəmizin müstəqilliyinə aparan yolda uzaqgörən siyasətindən, siyasi iradəsindən, müdrik qərarlarından danışdı. Müstəqilliyə aparan yolda yaranan çətinlikləri qeyd edən dövlət başçısı gənclərin bu tarixi bilməklərinin, müəllimlərin bu tarixi onlara çatdırmaqlarının vacibliyini bildirdi.
Vurğuladı ki, bu, bir daha belə hadisələrin təkrarlanmaması üçün önəmlidir. — Bu gün Azərbaycanda xalqın iradəsinin hökm sürdüyünü, ölkəmizin dünya miqyasında müasir, sürətlə inkişaf edən, adət-ənənələrinə sadiq dimanamik ölkə olduğunu, xalqın iqtidarı dəstəklədiyini deyən dövlət başçısı dünyada bizə rəğbətin artdığını, dünya birliyinin əksəriyyətini təşkil edən ölkələrin nüfuzlu beynəlxalq təşkilatlarda bizə səs verdiklərini bildirdi. Xarici siyasətlə bağlı uğurlarımızdan danışan dövlət başçısı bütün tribunalardan Azərbaycanın öz haqq səsini ucaltdığını dedi. Son 2 ay ərzində də ölkəmizdə mühüm beynəlxalq tədbrlərin keçirildiyini, o cümlədən Qoşulmama hərəkatına sədrliyə başladığımızı, dünya dini liderlərinin görüşünün baş tutduğunu xatırladan dövlət başçısı Azərbaycanda mültikultural mühitin hökm sürdüyünü, daxili vəziyyətin sabit, iqtisadi göstəricilərin yasxı olduğunu, bütün sahələr üzrə artımın qeydə alındığını, islahatların davam etdirildiyini, sosial sahəyə böyük diqqətin yetirildiyini qeyd etdi. Prezident İlham Əliyev özünün də 5 il ərzində müəllim kimi fəaliyyət göstərdiyini, bu peşənin onun üçün yad olmadığını dedi. Dövlət basşçısı bildirdi ki, yeni peşələrin mənimsənilməsi, vətəndaşların bu peşələrə yiyələnməsi üçün şəraitin yaradılması böyük əhəmiyyət kəsb edir. Gənclərin vətənpərvər ruhda böyümələrinin, milli ruhda tərbiyyə almalarının önəmindən danışan Prezident İlham Əliyev yalnız bu təqdirdə onların ölkəmizi gələcəyə inamla aparacaqalrını vurğuladı.
BDU loqotipinin qrafik-rəqəmsal təqdimatı keçirildikdən sonra Universitetin rektoru Elçin Babayev, ali təhsil ocağının professoru Firuzə Abbasova çıxış etdilər, Bakı Dövlət Universitetinin məşhur 60 aliminə həsr olunmuş “İthaf” kompozisiyası təqdim edildi, Bakı Dövlət Universitetinin Jurnalistika Fakultəsinin tələbəsi Rəşad İmanovun çıxışı oldu, “Tələbənin yolu” rəqəmsal qrafik təqdimat keçirildi. Bakı Dövlət Universitetinin 100 illik yubileyinə həsr olunan mərasim bu ali təhsil müəssisəsinin himni ilə yekunlaşdı.
