ABŞ bu ölkəyə uçuşu dayandırdı – 45 gün vaxt verdi

ABŞ Havana hava limanı istisna olmaqla, Kubadakı bütün aeroportlara uçuşları dayandırıb.

“Qafqazinfo”nun “Kommersant”a istinadən verdiyi xəbərə görə, aviaşirkətlərə bütün planlaşdırılan uçuşları ləğv etmək üçün 45 gün vaxt verilib. Məhdudiyyət doqquz Kuba hava limanına şamil olunub.

“Bu gün nəqliyyat nazirindən Havana Hava limanı istisna olmaqla ABŞ və bütün Kuba hava limanları arasında müntəzəm uçuşların dayandırılmasını xahiş etdim. Bu qərar Kastro rejiminin ABŞ-a hava səyahətindən qazanc əldə etməsinə və əldə edilən gəlirlərdən Kuba xalqını sıxışdırmaq üçün istifadə etməsinə imkan verməyəcək”, -deyə ABŞ dövlət katibi Mayk Pompeo Dövlət Departamentinin qərarını şərh edərkən bildirib.

Daha sonra Kuba Xarici İşlər naziri Bruno Rodriqes Parrilya öz tvitter mikrobloqunda  rəsmi Vaşinqtonun bu addımını tənqid edib: “ABŞ tərəfindən Kubanın mühasirəyə alınması yönündə verilmiş qərarı qəti şəkildə qəbul etmirik. Bu, xalqlarımız arasındakı münasibətlərə xələl gətirəcək. Güzəşt olmayacaq, qalib gələcəyik”.

Qeyd edək ki, Donald Trampın Ağ Evə gəlişi ilə iki ölkə arasında münasibətlər yenidən pisləşib. 2017-ci ildə ABŞ hökuməti diplomatik heyətinin 60% -nin Kubadan geri çağırılmasını və adada Amerika giriş vizalarının qeydiyyatının dayandırıldığını elan edib. 2019-cu ilin aprelində ABŞ Dövlət Departamenti, Kubada iş görən beynəlxalq şirkətlərə qarşı məhkəmə iddialarının qaldırılmasına icazə verib. 2019-cu ilin iyununda ABŞ vətəndaşları üçün Kubaya qrup səyahətini məhdudlaşdırılıb.

Share: