Müstəqil.Az saytında “Uzaqdan bir şeir” layihəsinə başladıq.
Hərdən gəncliyimdə yazdığım şeirləri paylaşırdım. İlləi dəqiq xatırlamadığımdan “uzaqdan bir şeir”yazırdım sadəcə. Sayt bu şeirləri elə bu başlıqla yayımlayırdı və sayt rəhbərinin təklifi ilə “Uzaqdan bir şeir “i layihə kimi təqdim etməyə qərar verdik.
Siz də “Uzaqdan bir şeir”inizi və ya sevdiyiniz bir şeiri müəllifi göstərməklə bizə göndərə bilərsiz.
Layihənin rəhbəri: Kəmalə Abiyeva
Allahverdi MƏMMƏDLİ
AY İŞIQ SUYUNA ÇƏKDİ ÖMRÜMÜ
Təzə bədirlənmiş aya baxanda
duruldu gözlərim bulaq gözü tək.
Ayın buz ovcunda, bəyaz ovcunda
Döndü barmaqlarım od lüləsinə
Közərdi sübhəcən ardıc gözü tək.
Gündüz borc aldığım bir baxış nurla
gecənin gözünü alacaladım.
Qaralmış əllərim ocaq daşıydı-
günəşi sac kimi qoyub üstünə
ovcumda ay üçün tonqal qaladım.
Yığışdı ulduzlar yerin başına,
Söndü kor zülmətin qaraçırağı.
Ay çəkdi ömrümü işıq suyuna-
Yanında ömürlük üzüağ olum
bizi od parçası doğan torpağın.