Başqa ittihamlar olmasa, Səlim Müslümovu azı 10 il həbs gözləyir – Ekspert

“Bu həbs yalnız Səlim Müslümovla məhdudlaşmayacaq, başqaları da var”. 

Müstəqil.Az bildirir ki, bunu Qaynarinfo-ya açıqlamasında hüquq müdafiəçisi Əkrəm Həsənov sabiq Əmək və Əhalinin Sosial Müdafiəsi naziri Səlim Müslümovun həbsindən danışarkən deyib. Vəkil bildirib ki, sözügedən nazirlik zamanında ən çox korrupsiyalaşmış sahələrdən biri olub:
 
“Bu, Azərbaycanda yaxşı tendensiyadır. Əvvəllər kimsə vəzifədən gedirdi, yerinə təzəsi gəlirdi, heç nə dəyişmirdi. Əvvəlki rəhbərə qarşı heç bir tədbir görülmürdü. Niyə? Vəzifədən kim gedirdisə, onun yerinə gələn əvvəlkinin cinayətlərini açmırdı. Çünki onun hansı yollarla cinayət edib pul qazandığını açıqlasaydı, özü sonra həmin yollardan istifadə edə bilməyəcəkdi. İndi bu sistem dəyişilib. Vəzifəyə əsasən gənc kadrlar təyin olunur, onlar da düz işləyir. İşlədiyi dövrlərdə müəyyən edirlər ki, ondan əvvəlki rəhbərlər min oyundan çıxıblar. Təbii ki, bunların araşdırılmasına xeyli vaxt lazımdır. Bildiyimə görə, həmin nazirlik vaxtı ilə ən korrupsiyalaşmış sahələrdən biri olub. Məsələn, rayonlarda hamının qohumu yaşayır. Hamı bilirdi ki, saxta pensiya, əlillik dərəcəsi alanların sayı gündən-günə artırdı. Fərqi yoxdur ki, kim nə vaxt vəzifədən gedib. Əgər nazir vəzifədə olanda düz işləməyibsə, məsuliyyətə cəlb olunmalıdır. Gözləyirəm ki, bu həbs yalnız Səlim Müslümovla məhdudlaşmasın. Ondan başqa digərləri də var”.
Əkrəm Həsənov Səlim Müslümova qarşı ağır ittihamların irəli sürüldüyünü deyib:
“Kifayət qədər ağır maddələr ürəli sürülüb. Onu ən azı 10 il həbs gözləyir. Əgər sonra başqa ittihamlar ortaya çıxarsa, o zaman bu rəqəm artacaq”.
Share: