Azərbaycan musiqi mədəniyyətinin zəngin xəzinəsində elə sənətkarlar vardır ki, onların adı təkcə ifa etdikləri mahnılarla deyil, həm də yüksək insani keyfiyyətləri, vətənə bağlılıqları və xalqın sonsuz sevgisi ilə yaşayır.
Belə sənətkarlar sırasında Azərbaycan Respublikasının Əməkdar artisti Yusif Mustafayev özünəməxsus yeri olan, geniş dinləyici auditoriyasının rəğbətini qazanmış sənət adamlarından biridir.
1955-ci ildə Hacıismayıllı kəndində dünyaya göz açan Yusif Mustafayev uşaqlıq illərindən musiqiyə böyük maraq göstərmiş, zəngin xalq musiqisi mühitində formalaşmışdır. Sənət yoluna ötən əsrin 80-ci illərində qədəm qoyan müğənni qısa müddətdə özünəməxsus səsi, fərqli ifa tərzi və milli ruhu ilə seçilərək dinləyicilərin sevgisini qazanmışdır. 2015-ci ildə ona Azərbaycan Respublikasının Əməkdar artisti fəxri adının verilməsi uzun illər ərzində göstərdiyi sənət fəaliyyətinə dövlət tərəfindən verilən yüksək qiymətin ifadəsidir.
Yusif Mustafayev Azərbaycan estrada və xalq musiqisinin inkişafına mühüm töhfələr vermiş sənətkarlardandır. Onun repertuarında xalq mahnıları, bəstəkar əsərləri və muğam təsnifləri xüsusi yer tutur. İfa etdiyi mahnılar uzun illərdir xalqın yaddaşında yaşayır və müxtəlif nəsillərin sevə-sevə dinlədiyi musiqi nümunələrinə çevrilib. O, 1980-ci illərdə Azərbaycan musiqisinə yeni nəfəs gətirən, milli musiqi ənənələrini müasir ifa tərzi ilə uğurla birləşdirən sənətkarlar nəslinin layiqli nümayəndələrindən hesab olunur.
Lakin Yusif Mustafayevi sevdirən yalnız onun gözəl səsi deyil. Onu yaxından tanıyanlar ilk növbədə sadəliyindən, təvazökarlığından və səmimiyyətindən danışırlar. Onunla qısa bir söhbət belə insanın yaddaşında xoş təəssürat yaradır. Qazandığı şöhrətə baxmayaraq, o, xalqından ayrılmayan, insanlarla daim səmimi ünsiyyət quran sənətkarlardandır.
Yusif Mustafayev doğulduğu torpağa xüsusi sevgi ilə bağlıdır. Doğma Hacıismayıllı kəndinin inkişafına göstərdiyi diqqət və qayğı yerli sakinlər tərəfindən minnətdarlıqla xatırlanır. Bildirilir ki, onun təşəbbüsü və dəstəyi ilə kənddə məscid inşa olunaraq sakinlərin istifadəsinə verilib, yollar çəkilib, eləcə də bir sıra bulaqlar istifadəyə açılıb. Bu xeyirxah əməllər onun doğma yurda bağlılığının və yüksək mənəvi dəyərlərinin bariz təzahürü kimi qiymətləndirilir.
Vətən sevgisi Yusif Mustafayevin həyat və yaradıcılığının əsas dəyərlərindəndir. O, milli-mənəvi irsimizin qorunmasına xidmət edən sənəti ilə yanaşı, Azərbaycan dövlətinə və xalqına olan sədaqətini də hər zaman əməli fəaliyyəti ilə nümayiş etdirmişdir.
Sənətkarın həyat yolu göstərir ki, əsl şöhrət yalnız alqışlarla qazanılmır. Xalqın sevgisini qazanmaq üçün yüksək sənətkarlıqla yanaşı, saf ürək, xeyirxahlıq, təvazökarlıq və doğma el-obaya bağlılıq da vacibdir. Məhz bu keyfiyyətlər Yusif Mustafayevin illər keçsə də xalqın qəlbində yaşamasının əsas səbəblərindəndir.
Bu gün də Yusif Mustafayev Azərbaycan musiqisinin sevilən simalarından biri kimi öz sənəti ilə milli musiqi mədəniyyətimizin zənginləşməsinə xidmət edir. Onun keçdiyi ömür yolu, sənətə sədaqəti və xeyirxah əməlləri gələcək nəsillər üçün dəyərli örnəkdir.
Belə sənətkarlar zamanın sınağından çıxaraq xalqın yaddaşında əbədi yaşayırlar. Yusif Mustafayev də məhz həmin sənətkarlardandır – səsi ilə könüllərə yol tapan, insanlığı ilə hörmət qazanan və doğma Vətəninə xidmət etməyi ömrünün mənasına çevirən əsl el sənətkarıdır.
Şair-publisist, Prezident mükafatçısı
Damət Salmanoğlu
