Azərbaycan İtaliyadan 10 ədəd “M-346” tədris-döyüş təyyarəsini əldə edib və 15 belə təyyarəni sifariş edib.
Publika.az xəbər verir ki, bu haqda Rusiyanın ridus.ru portalı bildirib.
“M-346” İtaliya və başqa ölkələrin Hərbi-Hava Qüvvələrinin pilotlarının uçuş hazırlığı üçün nəzərdə tutulmuş təyyarədir. Təyyarə iki “F-124-GA-200” turboreaktiv mühərriki ilə təhciz edilib. Bu mühərriklər hava gəmisinə saatda 1050 kilometr sürətə çatmağa imkan verir. “M-346” 3 tona qədər çəkisi olan mərmilər və bomba daşıya bilir.
İtaliyanın Hərbi Hava Qüvvələrinin silahlanmasında 18 belə təyyarə var. Belə təyyarələrin sayı Sinqapurda 12, İsrail 30, Polşada isə 8 ədəddir.
Təyyarələri istehsal edən “Leonardo Aircraft” şirkətinin müştəriləri arasında Azərbaycan Müdafiə Nazirliyi də var. Azərbaycan bu təyyarələri ilk dəfə 2017-ci ilin mayında nümayiş etdirmişdi. Ancaq həmin vaxt Azərbaycanın Hərbi Hava Qüvvələrinin silahlanmasına qəbul edilmiş bu təyyarələrin sayı haqqında informasiya elan edilməmişdi.
