Güclənməkdə olan Bavi tayfunu ABŞ-nin Şimali Mariana adalarına doğru hərəkət edir. ABŞ Sahil Mühafizəsi Quam və Saypan limanlarındakı dənizçilik sektorunu təcili hazırlıq görməyə çağırıb.
Müstəqil.Az “Seanews.az”-a istinad edərək xəbər verir ki, Sahil Mühafizəsi Apra bazasında yerləşən patrul gəmilərini təhlükəsiz ərazilərə çıxarmağa başlayıb, kiçik qayıqlar isə quruya daşınaraq mühafizəyə götürülür. Qurum bildirib ki, bu səbəbdən fırtına öncəsi və zamanı axtarış-xilasetmə imkanları müvəqqəti məhdudlaşacaq.
Son məlumata görə, Bavi saatda təxminən 12 düyün sürətlə qərb-şimal-qərb istiqamətində hərəkət edir, küləyin sürəti isə 105 düyünə çatıb. Sinoptiklər tayfunun isti sular üzərində daha da güclənərək gələn həftənin əvvəlində bölgəyə 5-ci kateqoriya gücündə çatacağını proqnozlaşdırırlar.
ABŞ Milli Meteorologiya Xidməti tayfunun Şimali Mariana adaları üçün ciddi təhlükə yaratdığını bildirib. Hazırkı proqnoza əsasən, əsas zərbənin Tinian adasına dəyəcəyi gözlənilsə də, trayektoriyanın dəyişməsi nəticəsində Quam və ya Saypan da təhlükə altında qala bilər. Bölgədə dalğaların hündürlüyünün 25–35 futa, tayfunun mərkəzinə yaxın ərazilərdə isə 40 futa çatacağı gözlənilir.
Quam qubernatoru Lurdes A. Leon Qerrero artıq fövqəladə vəziyyət elan edərək sakinləri hazırlıq görməyə çağırıb. Bu il region Sinlaku tayfununun da təsirinə məruz qalmış, həmin fırtına zamanı Mariana yük gəmisinin altı nəfərlik ekipajı həlak olmuşdu.
Müstəqil.Az
