Elman ELDAROĞLUNUN Mir ŞAHİNƏ təbrik mesajı

“Basqa yaz, bahar gələcək,

Yağış yağıb, qar gələcək,”

Dünya bir gün dar gələcək,

Səndən bir də olmayacaq!

Desəm ki, bir ünlü eloğlum kimi nə vaxtsa hansısa bir problemimin həllində vasitəçi olub, səhv danışaram. Desəm ki, nə vaxtsa xeyir-şərimdə iştirak edib, yenə də səhvə yol verərəm. Necə deyərlər, nə istisində qızınmışam, nə də soyuğunda donmuşam. Amma, ata yurdum Yardımlıya olan məhəbbətimdə bütün yurddaşlarım kimi, onun da payı var. Necə ki, Sabir Rüstəmxanlını, Mirmahmud Mirəlioğlunu və yüz minlərlə həmyerlimi özümə doğma bilirəm, o da mənə doğmadır. Necə deyərlər, bədənimin bütün üzvüləri kimi mənimdir, hər hansı biri zədələnsə, öz funksiyasını itirsə canım ağrıyar, günüm qara olar…

Bəli, Mir Şahin Ağayevin də el-oba təəssübkeşliyimdə, doğma Yardımlıya, ata-baba yurduma vəfa borcumda öz payı var. Kim onu necə tanıyır, necə qələmə verir özü bilər. Mənim üçün Mir Şahin Ağayev dədə-babasını tanıdığım, nəslinə-nəcabətinə bələd olduğum bir eloğludur. Noyabrın 12-si onun 62 yaşı tamam olur. Əlimə düşən, nə vaxtsa qələmə aldığı bu şeiri ilə onu təbrik edir, uzun ömür arzulayıram. Və deyirəm ki, bədxahları nə qədər olsa da, onun adını müstəqil telejurnalistika tariximizdən silə bilməyəcəklər…