Banu MUHARREM
Azərbaycan Yazıçılar Birliyinin üzvü, Prezident təqaüdçüsü,
Azərbaycanın Mədəniyyət və Ədəbiyyat Portalının Baş redaktoru
Çoxlarının öyündüyü yoxuşdu.
Çoxlarının göründüyü duruşdu.
Çoxlarının süründüyü nə xoşdu.
Çoxlarının etibarı boşdu, boş!
Çoxlarının sultanlıqdır həvəsi,
Çoxlarının sözə çatmır nəfəsi.
Çoxlarının məhəbbətdə qəfəsi,
Çoxlarının intizarı boşdu , boş!
Çoxlarının sözü dəyərləndirir.
Çoxlarının sözü dəyər endirir.
Çoxlarının sözü diyirləndirir.
Çoxlarının ixtiyarı boşdu, boş!
Çoxlarının əqidəsi çolaqdır,
Çoxlarının rabitəsi qulaqdır.
Çoxlarının abidəsi ulaqdır.
Çoxlarının ixtisarı boşdu, boş!
****
Gömsə arzusunu içinə insan
üstünə qırmızı çiçək də əkər.
Bir gün gözlərindən düşüb daşınsan
Sevgi küçəsindən izini silər.
.
Ruhunu qəfildən qoparmış kimi,
Ən yaxşı halını aparmış kimi,
Əksini bir daha taparmış kimi,
gözünün torunda üzünü silər.
.
Cismini sevginin istisi basmış,
nəfəs bir bədənə canlı libasmış,
Bihudə sevgilər həddini aşmış
qəlbində -təpəri,dözümü silər.
.
Adam var çox şeyə dözər,kar olar.
Həddindən ziyadə təzimkar olar.
Adam var o qədər təmizkar olar-
Girər ürəyində sözünü silər…
.
Könlü olmayana halın qüsurdur,
Əlçatmaz sevgilər qəlbə qüsuldur.
Bu necə bir sirrdir,nə cür üsuldur?
Başqası uğrunda özünü silər!
