Prezident İlham Əliyev: “Sağlam gənc nəsil, ilk növbədə, ölkənin gələcək inkişafı üçün lazımdır”
Azərbaycan idmançılarının beynəlxalq yarışlarda Dövlət Bayrağımızı zirvəyə qaldırması hər bir vətəndaş üçün sözlə ifadə olunmaz qürur mənbəyidir. Bu anlar təkcə idman uğuru deyil, eyni zamanda xalqın iradəsinin, milli birliyinin və dövlət gücünün rəmzinə çevrilir. Son 5 il ərzində Azərbaycan Bayrağının qalib ölkənin bayrağı kimi beynəlxalq arenalarda mütəmadi şəkildə ucaldılması təsadüfi deyil – bu, planlı inkişafın, dövlət qayğısının və idmançılarımızın əzmkarlığının nəticəsidir. İdman artıq təkcə fiziki bacarıqların nümayişi deyil. Müasir dövrdə o, ölkələrin beynəlxalq imicinin formalaşmasında mühüm rol oynayan strateji sahələrdən biridir. Azərbaycan idmançıları yarış meydanlarına çıxarkən təkcə fərdi uğur üçün deyil, bütöv bir xalqı təmsil etdiklərini dərindən dərk edirlər. Beynəlxalq arenalarda hiss edilən hörmət, ölkəmizə və xalqımıza göstərilən münasibət idmançılarımıza əlavə güc və inam verir. Prezident İlham Əliyevin 2025-ci ilin idman yekunlarına həsr olunan mərasimdə səsləndirdiyi fikirlər Azərbaycanda idmanın inkişafının yalnız idman nailiyyətləri ilə məhdudlaşmadığını, daha geniş strateji məqsədlərə xidmət etdiyini aydın şəkildə ortaya qoyur. Dövlət başçısının vurğuladığı kimi, sağlam gənc nəslin formalaşdırılması ölkənin gələcək inkişafının əsas şərtidir və bu məqsədə nail olmaqda idman mühüm rol oynayır.
Prezident İlham Əliyev çıxışında qeyd edib ki, düzgün və ardıcıl aparılan dövlət siyasəti idmanın inkişafını şərtləndirir və gəncləri idmanla məşğul olmağa daha da həvəsləndirir. Bu yanaşma onu göstərir ki, idman təkcə yarışlarda qazanılan medallar demək deyil, eyni zamanda cəmiyyətin sağlamlığının qorunması, gənclərin düzgün istiqamətdə formalaşdırılması və milli potensialın gücləndirilməsi vasitəsidir. Sağlam həyat tərzinin təşviqi məhz gənc yaşlardan başlamalıdır ki, bu da gələcəkdə həm güclü idmançıların, həm də sağlam və fəal vətəndaşların yetişməsinə zəmin yaradır.
Xüsusilə son 5 ildə bu qürur hissi daha dərin məna kəsb edir. Azərbaycanın əldə etdiyi şanlı Qələbə təkcə hərbi-siyasi tariximizdə deyil, milli şüurumuzda da yeni bir mərhələ açdı. Bu Qələbə bütün sahələrdə olduğu kimi, idmanda da məsuliyyəti qat-qat artırdı. Bu gün Azərbaycan idmançıları yarışlara artıq müzəffər xalqın nümayəndələri kimi çıxırlar. Onlar bilirlər ki, sinələrində daşıdıqları gerb, çiyinlərində dalğalandırdıqları bayraq qalib bir dövlətin rəmzidir. Bu məsuliyyət idmançılarımızı daha intizamlı, daha məqsədyönlü və daha prinsipial edir. Onlar yalnız medal qazanmaq üçün deyil, Azərbaycan adını uca tutmaq, dövlətin gücünü və xalqın ruhunu nümayiş etdirmək üçün mübarizə aparırlar. Məhz buna görə də idman arenalarında səslənən Azərbaycan Himni və yüksələn Dövlət Bayrağı milyonlarla insanın qəlbində həm qürur, həm də kövrəklik yaradır.
Dövlət başçısının xüsusi olaraq vurğuladığı əsas məqamlardan biri budur ki, sağlam gənc nəsil olmadan idman uğurlarını əldə etmək mümkün deyil. İdmanda böyük nəticələr fiziki sağlamlıq, iradə, intizam və davamlı zəhmət tələb edir. Bu keyfiyyətlər isə uşaqlıqdan formalaşır. Məhz buna görə də Azərbaycanda uşaqların və yeniyetmələrin idmana cəlb olunması dövlət siyasətinin prioritet istiqamətlərindən birinə çevrilmişdir.
Son illər ərzində ölkənin bütün bölgələrində yaradılan müasir idman infrastrukturu, Olimpiya İdman kompleksləri, idman məktəbləri və zallar gənclərin idmanla məşğul olması üçün geniş imkanlar açır. Bu şərait uşaqlarda idmana marağı artırır, onların fiziki inkişafını təmin edir və gələcək uğurlar üçün möhkəm bünövrə yaradır. Uşaqlıqdan idmana göstərilən maraq təkcə peşəkar idman karyerasına deyil, həm də sağlam həyat tərzinin vərdişə çevrilməsinə yol açır. Prezident İlham Əliyevin çıxışında qeyd edildiyi kimi, sağlam gənc nəsil ilk növbədə ölkənin gələcək inkişafı üçün lazımdır. Fiziki cəhətdən sağlam olan vətəndaşlar daha məhsuldar olur, cəmiyyətin sosial və iqtisadi həyatında fəal iştirak edir, dövlətin inkişafına töhfə verirlər. Bu baxımdan idman yalnız idman sahəsinə deyil, bütövlükdə milli inkişaf strategiyasına xidmət edən mühüm amildir. Eyni zamanda, idman gənclərdə vətənpərvərlik hissinin, komanda ruhunun, məsuliyyət və nizam-intizamın formalaşmasında mühüm rol oynayır. Beynəlxalq yarışlarda Azərbaycan bayrağı altında çıxış edən idmançılar gənclər üçün nümunəyə çevrilir, onları daha böyük hədəflərə can atmağa ruhlandırır. Bu isə cəmiyyətin sağlam və məqsədyönlü inkişafını təmin edən əsas faktorlardandır.
Dövlət tərəfindən idmana göstərilən ardıcıl diqqət və qayğı bu uğurların əsas dayaqlarındandır. Yeni idman infrastrukturu, gənclərin idmana cəlbi, peşəkar məşqçilərin hazırlanması və beynəlxalq yarışlara sistemli hazırlıq Azərbaycan idmanının dayanıqlı inkişafını təmin edir. Bu siyasətin nəticəsi olaraq idmançılarımız dünyanın ən nüfuzlu yarışlarında söz sahibi olurlar. Prezident İlham Əliyev çıxışında qeyd edib ki, gənclər Vətən sevgisi ilə böyüməli, düzgün tərbiyə almalı və bu dəyərləri həyatlarının əsas prinsipi kimi qəbul etməlidirlər. Belə bir gənc nəsil formalaşdığı təqdirdə ölkənin inkişafı da sabit, davamlı və möhkəm olacaqdır. Bu baxımdan gənclərin tərbiyəsi yalnız ailənin və ya təhsil müəssisələrinin deyil, bütövlükdə dövlətin və cəmiyyətin qarşısında duran mühüm vəzifədir.
Prezidentin çıxışında gənclərin fiziki hazırlığı ilə mənəvi saflığının vəhdət təşkil etməsinin vacibliyi də xüsusi vurğulanır. Dövlət başçısı qeyd edir ki, yalnız fiziki cəhətdən güclü olmaq kifayət deyil, eyni zamanda mənəvi cəhətdən saf, milli dəyərlərə bağlı və məsuliyyətli vətəndaşlar yetişdirilməlidir. Məhz bu vəhdət təmin olunduqda ölkə uğurla inkişaf edə bilər. Güclü bədən və sağlam ruh bir araya gəldikdə cəmiyyətin dayanıqlılığı və inkişaf potensialı daha da artır. Bu kontekstdə idmanın rolu xüsusilə böyükdür. Prezident İlham Əliyevin vurğuladığı kimi, idman gənc nəslin vətənpərvərlik ruhunda tərbiyə edilməsində mühüm vasitədir. İdman gənclərdə intizam, iradə, məsuliyyət, rəqabətə davamlılıq və komanda ruhu formalaşdırır. Eyni zamanda, beynəlxalq yarışlarda ölkəni təmsil edən idmançılar gənclər üçün canlı nümunəyə çevrilir, dövlət bayrağını yüksəklərə qaldıraraq milli qürur hissini gücləndirirlər.
Azərbaycanda idmanın inkişafı ilə paralel olaraq gənclərin fiziki və mənəvi tərbiyəsinə yönəlmiş genişmiqyaslı proqramların həyata keçirilməsi bu siyasətin real nəticələrini göstərir. Regionlarda yaradılan idman infrastrukturu, Olimpiya İdman kompleksləri, idman məktəbləri və kütləvi idman tədbirləri gənclərin sağlam həyat tərzinə cəlb olunmasına, eyni zamanda onların milli ruhda formalaşmasına xidmət edir. Prezident İlham Əliyevin 2025-ci ilin idman yekunlarına həsr olunan mərasimdə səsləndirdiyi fikirlər bir daha təsdiq edir ki, idmanın inkişafı Azərbaycanda insan kapitalının gücləndirilməsinə, sağlam gənc nəslin yetişdirilməsinə və ölkənin uzunmüddətli inkişafına yönəlmiş strateji siyasətin tərkib hissəsidir. Sağlam gənclik isə güclü dövlətin və uğurlu gələcəyin ən etibarlı təminatıdır.
Paşazadə Kamal Çingiz oğlu
Qara Qarayev adına Mərkəzi İncəsənət Məktəbinin violonçel ixtisası üzrə müəllimi, Azərbaycan Respublikasının Əməkdar müəllimi
