Azərbaycan Zəfəri millətin bütövlük arzusu ilə yoğrulmuş ən böyük tarixi dönüş nöqtələrindən biridir və bu dönüşün mərkəzində təkcə silahın gücü yox, həm də Azərbaycan gəncliyinin sarsılmaz iradəsi dayanır.
Müasir dövrün çağırışları içində yetişən, elm və texnologiyanın imkanlarını, milli ruhun qüdrətini birləşdirən bu nəsil Vətən müharibəsində yalnız döyüş meydanlarının deyil, həm də mənəvi səhnənin qəhrəmanlarına çevrildi. Onların ruhunda həm babaların Qarabağ həsrəti, həm anaların göz yaşından doğulan qürur, həm də müstəqil dövlətin verdiyi güvən vardı. Buna görə də gənclər zəfərin ən önəmli sütununa çevrildilər.44 günlük müharibədə cəbhəyə yollanan gənclər bir məfkurənin daşıyıcıları idilər; onlar torpaq anlayışını xəritə üzərində deyil, qəlbin mərkəzində daşıyırdılar. Komandirlərin əmrlərini yerinə yetirən sadə əsgər gənclərdən tutmuş, strateji əməliyyatları həyata keçirən zabit gənclərə qədər hamısı bir ideyanın xidmətində idi. Qarabağın azadlığı, Azərbaycan gəncliyi təkcə fiziki gücünün deyil, həm də yüksək intellektinin, çevik mühakiməsinin, müasir döyüş düşüncə tərzinin sayəsində ordunun modern ruhuna çevrildi.
Onların təhsildə qazandıqları biliklər, hərbi hazırlıqda topladıqları bacarıqlar, mənəvi tərbiyədə formalaşan millilik duyğusu torpağın alınmasında misilsiz rol oynadı.Ən mühümü, bu gənclər zəfərə yalnız müharibə meydanında deyil, informasiya cəbhəsində də töhfə verdilər. Sosial mediada Azərbaycanın haqq səsini dünyaya duyuran, dezinformasiyaya qarşı mübarizə aparan, xarici ölkələrdə oxuyan və çalışan gənclər ölkənin beynəlxalq imicinin gücləndirilməsində vacib rol oynadılar. Onların qlobal düşüncəsi, milli maraqları qayə bilən mövqeyi göstərdi ki, Vətən sevgisi yalnız sərhəd daxilində deyil, dünyanın hər guşəsində Azərbaycan adını ucalda bilər. Hərbi həkimlərdən tutmuş könüllülərə, texniki personaldan tutmuş media əməkdaşlarına qədər minlərlə gənc bu zəfərin görünən və görünməyən qəhrəmanları kimi tarixə düşdü.Şəhidlik zirvəsinə ucalan gənclər isə Azərbaycanın Zəfər salnaməsinin ən müqəddəs səhifəsini yazdılar. Onların taleyi milli yaddaşın əbədiyyətinə köçən misilsiz bir dərs oldu. Vətən sevgisi yaşdan, statusdan, imkanlardan asılı deyil, qəlbin bütövlüyündən doğur. Bu gənclər həyatlarını fəda edərək millətə öyüd verdilər ki, torpaq yalnız qorunan zaman torpaqdır, Vətən yalnız yaşanan zaman Vətəndir. Onların xatirəsi gəncliyin gələcək nəsilləri üçün həm qürur, həm də məsuliyyət mənbəyidir.Müharibədən sonrakı dövr də gəncliyin fəallığının davamı oldu. Qarabağın yenidən qurulması prosesində mühəndislikdən ekologiyaya, memarlıqdan səhiyyəyə qədər müxtəlif sahələrdə çalışan gənclər torpağın dirçəlişini öz həyatının məqsədinə çevirdi. Könüllü proqramlarda iştirak edən, sosial layihələr quran, mədəni irsin bərpasında iştirak edən gənclər göstərdi ki, zəfər yalnız alınan torpaqla deyil, ona nəfəs olan insanla tamamlanır. Zəfərin ruhunu yaşadan isə yenə gənclərin enerjisi, yaradıcılığı və dövlətinə olan sarsılmaz inamıdır. Nəticə olaraq, Azərbaycan gəncliyi Zəfərin həm səbəbi, həm daşıyıcısı, həm də davamçısıdır. Onlar millətin gücünü yalnız bugünün deyil, sabahın da zəmanətinə çevirdilər. Zəfər onların iradəsində formalaşdı, onların qanı ilə möhürləndi, onların təfəkkürü ilə gələcəyə daşındı. Bu gün Qarabağın azad səmasında dalğalanan üçrəngli bayraq Azərbaycan gəncliyinin fədakarlığının, birlik ruhunun, milli kimliyinin ən parlaq rəmzidir. Zəfərin əbədi qalması isə məhz bu gənc nəsillərin öz Vətəninə bağlılığı sayəsində mümkün olacaq. Çünki Azərbaycan gəncliyi var olduqca, Vətənin qələbəsi də daim yaşayacaq.
✍ Sevil Azadqızı
Azərbaycan dill və ədəbiyyatı müəllimi. Filoloq. Ədəbi təhlil və tənqidçi. Şair-publisist.
07.11.2025
